Accueil Tamazight Ad d-tili tfaska n tazart

Bni Mɛuc

Ad d-tili tfaska n tazart

322

Ad d-theggi temnaḍt n Bni Mɛuc tafaska n tazart ara d-yilin ɣef teɣzi n semmus n wussan, seg 1 ar 5 tuber 2019. D taẓrigt tis 17 ara d-yezzin aseggas-a, imi nuɣ tannumi yal aseggas akka imir-a tessuddus-d temnaḍt-a i d-yezgan deg tama n Ṣedduq leqdic-agi. D tiddukkla tadelsant Figuiculteur n Bni Mɛuc ara as-yilin i lmendad i tfaska-a s tallelt n tɣiwant. Ɣef wakken i d-nnan kra seg yimsuddsen n leqdic-a, “Ahil ad yili d anesbaɣur, ad neɛreḍ amek ara yif tidwilin yezrin”. Deg wahil, ad d-tili temsikent ɣef teɣzi n yakk ussan n tfaska, aṭas n tewsatin n tazart ara d-yersen deg temsikent.

Wid ara yerzun ɣer umkan ad d-skeflen leṣnaf yemxalafen n tazart i tekseb temnaḍt-agi, akken daɣen ara yili lḥeq n wid yebɣan ad aɣen, imi ad yili uznaz n yisufar-nniḍen igamanen insayanen am tazart taqurant, zzit, ddeqs n tewsatin n tamemt taḥrurt, akunfitur n tazart, lxel n tazart … Ma deg sin n wussan imenza n tfaska, yeɛni azekka n aram d seldazekka n ahad, ad d-yili yiwen n usarag aɣelnaw, d asarag ussnan adamsan amezwaru ara d-yilin di tmurt n Lezzayer ɣef usafar n tazart, deg tesnawit Loudjani Hachemi deg temdint n At Mɛuc, s uttiki n tesdawiyin n Bgayet d Sṭif.

Deg-s ad d-awin awal ɣef tarrayin tussnanin d tdamsanin d wamek i d-yettili unadi deg ṣṣenf-agi n tazart akked unamek n tuẓut-ines deg tmurt n Lezzayer s umata. Tafaska-a, ad tili daɣen d tagnit i yifellaḥen ad d-mmsemlilen gar-asen, ad mmeslayen u ad mbaddalen tirmi-nsen i lfayda n unegmu n usafar-a n tazart. Deg ttiɛadat i iɛeddan, aṭas n yimdanen i irezzun ɣer tfaska-a, akken ad d-awin ama d tamussni ama d asekfel n wayen ur ssinen ara.

I usmekti, tettuneḥsab temnaḍt n At Mɛuc d tamnaḍt ideg tuget lɣella n tazart deg yakk tamurt n Lezzayer. Tettwaxdam lɣella-a akken iwata sɣur imezdaɣ-is seg wid iḍefren lḥirfa-a, armi taggara-a llan wid yesseftin tadrimt, gan tikebbunay timecṭaḥ, maca ssarmen amer tɛawen-iten Tenmehla d Teɣlift n tfellaḥt akken ad sseftin ugar di ccɣel-a, acku d asafar yesɛan azal, i d-yettuɣalen s waṭas n lfayda ama i umdan, ama i tmurt s umata.

Kh. A.