Accueil Tamazight Ad d-tili tmeɣra n tzemmurt n At Zɛim

Ass aɣelnaw n useklu d Wass agraɣlan n teẓgi

Ad d-tili tmeɣra n tzemmurt n At Zɛim

105
Olive tree on red soil

Akken i tuɣ tannumi tddukkla tadelsant Tigejdit n AT Zɛim, i iqedcen deg taddart-a, i d-yezgen deg tɣiwant n Mɛatqa, s leqdicat-is idelsanen yemgaraden, tikkelt-a, ad tessuddes tazrigt tis 9 n tmeɣra n tzemmurt, ara yilin seg 21 ɣer 24 Meɣres 2019.

Aya, ad yili i lmend n usfugel n Wass aɣelnaw n useklu d Wass agraɣlan n teẓgi, anda yettuɛeggen, ad ttekkin ugar n 90 n yimsikniyen ara d-yasen seg rebɛa n tɣemmar n tmurt n Lezzayer. Aseggas-agi, ad d-yili usentel n tmeɣra ɣef wazal n tzemmurt deg wayen yeεnan tigemmi d tɣerma n yimaziɣen. Ma d tiwwurin n leqdicat-agi idelsanen, ad ilint d aseḥbiber ɣef tmagit tamaziɣt, rnu ɣef waya, azal n tzemmurt deg tudert n twaculin n Leqbayen, dayen i icuden, ladɣa, ɣer tdamsa n twacult taqbaylit, “ Tazemmurt, d agerruj n lebda, d tigemmi d tadamsa ».

Tazrigt-agi, d tagnit i usqerdec n temsalt i icuden ɣer tzemmurt, ama seg wazal-is adelsan, yeεnan tigemmi n tmetti d wassaɣ n ugdud amaziɣ d ugama, neɣ deg useqreb n tmuɣliwin yemgaraden i lfayda n tdamsa n temḍiqt n leqbayel. Deg tmeɣra-agi, ad ilin aṭas n wudmawen n uḥric n lɣella n uzemmur, ama d imussnawen n uḥric n tfellaḥt, ama d ifellaḥen, srabes n tfellaḥt, imesdawiyen, imɛelmen n tesyar n uzemmur d waṭas-nniḍen.

Heggan-d yiɛgalen n tddukkla yiwen n wahil s wazal-is i lemend n tmeɣra-agi n tzemmurt. Gar wayen yettwajerden deg waḥil, ad naf timsikniwin d lbiɛ n zzit n uzemmur n tɣiwant n Lemɛatqa, n tɣiwanin n ugerzu n Tizi Uzzu, Bgayet, Tubirett d Bumedes. Ad ilint, diɣ, timsikniwin n yisufar yetabaɛen ɣer lɣella n uzemmur : Legric, abaliɣ, aɛbuẓ, amurej, tisnatin d waṭas-nniḍen n yisufar.

Am wakken ara ilint temsikniyin d lbiɛ n yisufar-nniḍen, ladɣa tazart ( iniɣman-iḥbuben), tament akked d tid n temsikniwin d lbiɛ n tesnayin n uzemmur, tisyar n uzemmur, asewwi n leqbayel, afexxar n Lemɛatqa, lfeṭṭa, tiqenddyar…atg. Zyada ɣef wanect-a, ad d-ilin yisaragen ɣef wazal n tmeɣriwin tidelsanin deg useḥbiber, anegmu n yidles amaziɣ, tigemmi d tnagit. Rnu ɣef waya, asqerdec n temsal yeεnan tadamsa n temḍiqt n leqbayel.

Ad ilin yisaragen-agi s tallelt n yimussnawen n uḥric n uzemmur, anda ara yilin yimesdawiyen n Mouloud Mammeri, ITFV Sidi Aiche, CNCC El Harrache, SRPV Draa Ben Khedda, ITMAS Boukhalfa. Ad d- ilint, daɣen, tenmhalin n tuzzut, n ufras d uleqqem n uḥeccad ( aẓebbuj) akked tuẓẓḍa n uzemmur s tarrayt taqburt d usewwi n sabun.

D leqdic meqqren ara yilin deg tegnit-agi, anda ad d-mlilen yakk wudmawen n uḥric n tfellaḥt i usqerdec n temsal yeɛnan yal yiwen, ama d iɣeblan, ama d timuɣliwin i unegmu n uḥric n uzemmur n temḍiqt n leqbayel. Dɣa ula d amussu adelsan ad d-yili deg tiεad, s ccna, amezgun d tmedyazt.Tameɣra-agi i d-yettilin yal aseggas deg taddart n At Zɛim, ad tili, tikkelt-a, d tajmilt i yiwen gar yisekla igejdanen n temḍiqt n leqbayel, nTmura n yilel agrakal, d azamul n Yimaziɣen seg zik ar tura. Assuddes n tmeɣra-agi, yebda deg useggas n 2009, aṭas n umaynut i d-tewwi i lfayda n uḥric n uzemmur deg temḍiqt n Mɛatqa.

Ali Zalouk