I lmend n zerri n ṭam n yiseggasen segmi yemmut Muḥemmed Benḥanafi, awadem n tsekla d tmedyazt taqbaylit, yiwet seg tgejda yefkan tudert-nsen i rradyu n teqbaylit, thegga-d Ourida Sider, yiwen n usenfar asaru-arrat fell-as. Tessenked-d tazwart ɣef tikti n leqdic-a, ass-nni n 4 meɣres deg tiliẓri n Brtv, anda i d-fkan kra n yiwudam, inaẓuren d yimnadiyen, seg wid ixedmen d Benḥanafi, neɣ wid i t-yessnen, tinagiyin fell-as i temsuffeɣt Massa Sider. Taneggarut-a, tebges i leqdic-a, seg wasmi i d-tessuffeɣ adlis n tejmilt fell-as. Tikti, tusa-as-d seg Tfaska taɣelnawt n usaru amaziɣ, tenna ayɣer ala ur d-yettili ara usaru ɣef Benḥanafi i d-yewwin abrid n Si Muḥ Umḥend? Tenna-d “Ur yeshil ara akken ad texdmeḍ anadi ɣef yiwen am Benḥanafi, ladɣa ma d ayen yerzan asaru, yesran i waṭas n wallallen, itiknikiyen neɣ d wid n tedrimt”.
Maca, s tebɣest d lebɣi n tririt n tejmilt seg tama, d tririt n ureṭṭal seg tayeḍ, tessaweḍ ɣer lebɣi-s, acku akken i d-tenna Massa Sider, aṭas i tt-iɛawen Benḥanafi deg umaṭṭaf, telmed-d aṭas seg tussna-s, tamedyazt-is, d tudert-is s umata. Am wakken tella daɣen seg wid icerken amahil i waṭas n yiseggasen yid-s. Akken i iɛawen azal n ukkuẓ n tsutwin i d-iɛeddan seg uxxam n umaṭṭaf wis sin, I wakken ad nẓer azal ila urgaz-agi. Dɣa teṣber aṭas akken ad temmed aṣenfar-is. Asaru-a, yewwi-d ɣef tmeddurt n urgaz aseklan s umata, anwa-t, tudert-is di tegrawla, imi yekki d anesɣamu (lkumisar) deg tama n umalu, leqdic-is di rradyu tis snat i wazal n 45 n yiseggasen akked tudert-is deg temnaḍt n Medrissa deg Tyaret.
Ɣef wayɣer armi d imir-a i tebges temsuffeɣt n umaṭṭaf wis sin i leqdic am wa, tenna belli “Ahat asmi yella yedder Benḥanafi, tili ur iqebbel ara, neɣ ur yettmuddu ara azal i wayen-nni, acku ur iḥemmel ara ad mmeslayen wiyaḍ s waṭas fell-as, yezga yeqqar anwa i ɣef tettmeslayeḍ”, ɛlaḥasab n Ourida i ixedmen yid-s. Tessarem d leqdic ara iɛejben wiyaḍ, acku akken tenna dima, ilaq d nekni ara ixedmen ayla-nneɣ, ad as-nefk lqima, u ad nesseḥbiber fell-as. Asaru, ur yettɛeṭṭil ara ad d-yeffeɣ, s sin n yiḥricen n 52 mn. Syin, ad d-yezzin i tzeɣwa n tẓuri d ccna.
Khaled Achoui