Mbeɛd ddeqs n yiseggasen n uraǧu, tberreḥ-d Tebniqt n teywalt n Bgayet deg yiwen n ulɣu d akken, ɣer taggara, ad d-sfaydint tɣiwanin n Yiderginen d Tsexriwt, deg usamar n Bgayet, s usenfar n tuqqna ɣer lgaz n temdint deg wakuden iqerben i d-itteddun. Iban-d d unsib waya mi d-yessawel lwali n Bgayet i yiselwayen n tɣiwanin-a i d-nebder, Massen Xalef d Buǧiṭ, akken kan ad asen-d-iberreḥ s telɣut. Yuɣ lḥal, akken i d-tewwi teɣbalut-nneɣ, yella yuzzel s timmad-is s usuter ɣur Uɣlif n wafud (énergie) armi i as-t-id-qeblen. Deg wawal i d-fkan i tɣamsa seld timlilit-nni akked lwali, yesnemmer lmir n Tsexriwt Mass Mɛabed, yerna ibarek lgaz-a i yiɣermanen.
Akken ula d lmir n Yiderginen, ulamma yessarem ur ttilin ara abeɛda yisergal seg tama n yimezdaɣ mi ara d-yaweḍ lawan n usɛeddi n usenfar seg tferkiwin-nsen. Ilaq ad d-nini, yusa-d yisalli-a am tmuffirt yessefraḥen i yimezdaɣ n tɣiwanin-a acku tuɣ ur llin deg wahil n useggas-a. Seld mi d-yeffeɣ usenfar n lgaz i tɣiwant n Ayt Smaɛel, ara d-yettwawin si twilayt n Sṭif, aṭas i yellan ttmesteqsayen acuɣer ur d-ddint ara tɣiwanin n Tsexriwt d Yiderginen, neɣ daɣen ansi ara d-ɛeddin yijeɛbuben-nni n wurrig (lgaz). Ma yella si tɣiwant n Ayt Smaɛel, amek ara yili lḥal d taddart n rrif, neɣ seg Suq Letnin iɣer i d-yewweḍ yakan usenfar n lgaz.
Tura ihi, seld asenseb n yisalli n tuffɣa n usenfar i tɣiwanin-a, yezmer lḥal seg Suq Letnin ara d-iɛeddi, ad d-ikemmel alamma d Tasexriwt. Yewwi-d ad d-nesmekti belli yettuneḥsab usamar n Bgayet gar tamiwin tineggura i d-yesfaydin s usenfar-a n wurrig agaman. Ula d imezdaɣ, ɣas ulamma umren, ḥsan iɛeṭṭel mliḥ wurrig-a ad yekcem s ixxamen-nsen di tmurt i yettwassnen tesnuzuy-it ula i tmura tiwerdanin.
M. K.