Accueil Tamazight Ad d-yili ufraq n 1 600 n tnezduɣin sya ɣer taggara n...

TIZI UZZU - Tanegga taɣelnawt n uselhu d usnerni n tnezduɣin (AADL)

Ad d-yili ufraq n 1 600 n tnezduɣin sya ɣer taggara n useggas

44

Ɣef leḥsab n yisallen i d-nemger sɣur yimḍebbren n Tenmehla tadigant n tnezduɣin n ugezdu n Tizi Uzzu, ad d-yili ufraq n wazal n 1 624 n tnezduɣin n tanfalit n lkerya-asenzi sya ɣer taggara n useggas i deg i nella. Tinezduɣin-agi n taggayt n lkerya-asenzu, iɣef tella Tnegga Taɣelnawt n Uselhu d Usnerni n Tnezduɣin (AADL), yettuɛggen ad yebdu ufraq-nsent ɣef tlata n tɣiwanin deg taggara n waggur n cutember ɣer tazwara n waggur n tuber..

Ad naf deg tazwara 903 n tnezduɣin yellan deg tezgelt n unxef n Wad Fali deg tɣiwant n Tizi Uzzu. Rnu ɣef waya azal n 521 n tnezduɣin seg wahil n 1 000 n tnezduɣin, yettwabnan deg tɣiwant n Draa El Mizan. Am wakken ad naf daɣen azal n 200 n tnezduɣin deg temdint n Tamda, deg tɣiwant n Wagennun. Aya, ɣef leḥsab dima n yisallen n Tenmehla tadigant n tnezduɣin. Ad d-nesmekti kan d akken lwilaya n Tizi Uzzu, tesfaydi-d deg yiseggasen n 2013, 2018 d 2019 s wahil n tnezduɣin n taggayt lkerya-asenzu, s leḥsab amatu n 14 554 n tnezduɣin.

Deg wahil n tnezduɣin n 2013, saḥent-d i Tizi Uzzu azal n 5 700 n yixxamen, anda ara naf 3 000 ttwabḍant ɣef sin n yiḥricen, 2 000 d 1 000 n tnezduɣin. Ttwabnant tnezduɣin deg tezgelt n unxef n Wad Fali, 1 000 deg tɣiwant n Draa El Mizan d 1 000 deg tɣiwant n Iɛeẓẓugen, 500 deg tɣiwant n Uɣrib d 200 tiggura deg temdint n Tamda. Seg wahil-agi, ad naf aṭas n tnezduɣin i mazal urɛad ttwabnint s sseba n yiɣeblan n tenmegla n twaculin, anda ara naf azal 131 n tnezduɣin deg Draa El Mizan, 107 n tnezduɣin deg tɣiwant n Iɛeẓẓugen, rnu ɣef waya 40 n tnezduɣin deg Uɣrib i mazal urɛad i bddint s ssebba n lebni n tɣerɣart n uḥuddu n tesnawit n tlemmast n temdint-agi.

Yettwajerred deg wahil n tnezduɣin n useggas n 2018 lebni n 7 000 n tnezduɣin, deg temnaḍin n Draa El Mizan i d-saḥent 1 500 n tnezduɣin, 2 300 n tnezduɣin i Buzgen , 1 000 i Tizi Uzzu, 650 i Draa Ben Khedda, 458 i Buɣni, 453 i Uɣrib, 639 deg Tamda, ɣef leḥsab n yimeḍebber n Tenmehla tadigant n tnezduɣin. Bdan lebni n 1 082 n tnezduɣin deg Draa El Mizan deg wagguren iɛeddan, ma d ahil-nniḍen mazal urɛad yebda s ssebba n tenmegla n twaculin.

Ali Zalouk