Mbeɛd mi tessuli tallit n ujerred ass-nni n, 30 yunyu 2019, n yimsizewren yebɣan ad ttekkin deg temsizzelt n ccna, iwumi tefka Tddukkla tadelsant Tussna n taddart n Ubizar, isem n “Arraz Meksa Abdelkader i yicennayen ilmeẓyenˮ, tberreḥ s wumuɣ n yimsizewren n temsizzelt-agi.
Gar wayen i d-ibanen deg wulɣu n tddukkla timsuddest, ad yili umḥezwer n 23 n yicennayen ilmeẓyen ɣef warraz-agi Meksa Abdelkader deg tezrigt-is tamenzut. Ilmeẓyen-agi ara ittekkin deg temsizzelt-agi, ad ilin gar 8 ɣer 22 n yiseggasen di leɛmer-nsen. 10 deg-sen, ad myezwaren ɣef warraz n Meksa Abdelkader n tewsit ccna s taɣect (a capella), 13 n yilmeẓyen-nniḍen, ad myezwaren ɣef warraz n Meksa Abdelkader n tewsit ccna s wallal n uẓawan.
Ma d arraz n wallal n uẓawan “Instrumentˮ, ad rnun ad t-fken i yiwet gar snat n tewsatin-agi i d-nebder, imi ulac win ijerden deg ṣṣenf-agi aneggaru. Ma ɣef yilugan-nniḍen n temsizzelt-agi, ulac ccna s ṣṣenf n ugraw, ala awḥid i yellan. Rnu ɣer turart n kra n wallalen n uẓawan i telṭac-nni n ṣṣenf n ccna s wallal.
Ilaq diɣ, yal imsezwer ad d-yecnu snat n tezlatin, yiwet ad tili d afran n yilemẓi-nni tayeḍ ilaq ad tili n ucennay Meksa Abdelkader. Yetturaǧu ad tili temsizzelt-agi n lwilaya deg tezrigt-is tamenzut, ussan n 24 d 25 yulyu 2019, deg uɣerbaz Ben Ɛmer Ḥmed n taddart n Ubizar. Ma d ahil n temsizzelt-agi, ad d-yili d anesbaɣur.
Yetturaǧu ad yeddu akka: Ass n 24 yulyu 2019, mbeɛd tulya tunṣibt n tfaska-a, syin akkin d beddu n temsizzelt s timmad-is gar 23 n yilmeẓyen. Ma ɣer tmeddit n wass, ad tettunefk tegnit i turart n tmezgunin. I uzekka-in n, 25 yulyu 2019, ad yili usersi n tmeqqunt n yijeǧǧigen ɣef uẓekka n Meksa, yellan deg taddart n Mira, deffir-s kan, ad ilint ddeqs n tnagiyin ɣef tudert n ucennay-agi ilemẓi ɣer tmeddit d aberreḥ s yigemmaḍ d tukci n warrazen i wid ara d-yufraren.
Ad tesali temsizzelt-agi s tmeɣra n ccna n yinebgawen n lḥerma n tejmilt-a, sɣur Ali Ideflawen d Ḥsen Aḥris, ɣer tama n temsikent ɣef tudert d umecwar n Meksa ɣef teɣzi n sin wussan n temlilit-a. Ɣer yiḍ, ad kemmlen leqdicat idelsanen, gar usenɛet n leqdic n usikew n uẓawan n tddukkla-a ɣer tama n tmeɣra n ugraw n ccna i yigerdan “Amaḍal Kidsˮ. Am wakken daɣen ara farsen tagnit yimsuddsen n leqdic-agi i usebɣes n yinelmaden i d-yufraren deg yikayaden iɣurbizen-a BEM akked BAC.
A. A.