Ulamma yeččur wahil-is, i lmend n uheyyi i Zenith i t-id-yettraǧun i 12 deg yennayer, yerra-aɣ-d unaẓur Zedek Mouloud ɣef yisteqsiyen-nneɣ di tdiwennit-a.
Aɣmis n Yimaziɣen : Awal ɣef Zenith-ik ara d-yilin di kra n wussan…
Zedek Mouloud : Yelha wayen i aɣ-d-yewwḍen ar tura. Nekk umneɣ ad yili igerrez.
Akken i d-iban lḥal, tizlit « Yennayer » ad tili di teldayt…
Akka i yellan lḥal. Tizlit n Yennayer tettwaxdem i lmend n usihar-a n Zenith di yennayer.
Amek ɣef teẓrigin Tamara imi ur d-tsuffɣeḍ ɣur-sen?
Ih, acku ulac win ara yesferken. Ulac win yellan dinna di Tmurt. Tamara d tiẓrigin-inu. Maca ilaq ad yili di Tmurt win ara yazzlen fell-asent.
Nezmer ad d-nini teqseḥ n tezlit « A wer temlilit », d tagnit i tt-id-iḥettmen?
Nekk akka dima lḥasul. Uɣen tannumi lɣaci yid-i. Qqaren-ɣ ayen ttxemmimeɣ ɣef temcukkal i yellan deg tmetti taqbaylit. Ilaq ad nẓer d acu yellan deg-neɣ war ma nessewɛer tilufa. Llant kra n tɣawsiwin ilaq ad tent-nemyini.
Aṭas i yettmesteqsayen iwacu i d-tserseḍ ccna-k di tɣerɣar n uzdam. Yaḍra tesɛiḍ kra n yizerfan?
Yella waya. Ad i yi-d-uɣalen kra n yizerfan. Mačči d taɣawsa tameqqrant, maca akken yebɣu yili lemmer ur tent-rriɣ nekkini ɣer din, ad tent-rren wiyaḍ. Meqqar nniɣ-as ad tent-serseɣ nekk wala.
Mi ara nwali amedya-k keččini d win n Uleḥlu, iban-d yezmer ad yellaẓ ucennay amḥaddi di Tmurt…
Ih, d annect-nni. D asḥissef. Mer d lebɣi mačči akken-nni. D acu i aɣ-d-yewwin akk ɣer unfay? D annect-a. Nniɣ-t-id yakan acḥal n tikkal, belli di tmurt n Lezzayer d awanek i yeddebbiren ɣef yidles i wakken ad iṣekker tiwwura ɣef yinaẓuren imḥaddiyen, wid yettcewwilen.
Ini-aɣ-d awennit ɣef tedyant i yeḍran deg uẓekka n Lwennas Meɛtub?
Ur ẓriɣ ara amdan-nni ma yuḍen neɣ amek. Tura ma d ahlak i yehlek, teẓriḍ amek, ur nezmir ad neḥkem. D yiwen i ilaq ad yettudawi. Ma yella d ayen-nniḍen, ur nezmir ad neqbel. Tamezwarut, ilaq ad nẓer amek iga ccɣel-nni. Yessefk d wigad yetafaren taluft-a ara iwalin amek armi yessaweḍ umdan-a, ad iruḥ ad yawi tafḍist ɣer uẓekka n yiwen am Lwennas.
Terziḍ tikkelt yezrin i temlilit n JSK di Tunes. Mazal tirziwin tiyaḍ?
Ih, rziɣ ɣer Tunes, mazal ad dduɣ. Seg tikkelt ɣer tayeḍ, ad ruḥeɣ ad sfeqdeɣ. Ad rreɣ afud i wid yetturaren d wid iqeddcen di terbaɛt taqbaylit. Acku JSK, am wakken i t-id-qqareɣ yal tikkelt, d azamul. Ilaq ad tt-nessebɣes, ur ilaq ad tt-neǧǧ.
Yesteqsa-t M. K.