Uqbel tuɣalin-nsen ɣer uxeddim iɣef ɣaben kraḍ n wagguren-aya, ttheggin-d yimawlan n ttawilat n tumnayt d usiweḍ seg tura leḥris meqqren ɣef udabu. Deg-s ssuturen timerniwt di sswami n usiweḍ gar umḍiq d wayeḍ, ɣef tmentilt n sswami n lisens d lmazut i yulin s waṭas ussan-a yezrin. Deg unejmuɛ i xemden yigensasen n yinmula n usiweḍ akked teɣlift n usiweḍ, deg-s ssutren zzyada ara yawḍen ɣer 26% ɣef sswami tiqdimin, acku ula d lmazut s waṭas i yerna. Bla ccek, rray am wagi ur yetteɛǧab ara Izzayriyen, werɛad d-neffiɣ seg tezɣent n ukman i yeglan s texriḍ-t-nsen i jemɛen, rnu lqella n uxeddim d wuguren i d-yeǧǧa di tnefsit-nsen, armi i ten-id-iqubel rray am wa. Imawlan n ttawilat n usiweḍ seg tama-nsen, ttwalin sɛan azref, acku mačči deg ufus-nsen i llant tsura, ɣef waya i tlaq tmerniwt.
Ad rnun waṭas n yisufar-nniḍen
Ayen i yessagden Izzayriyen seg tura, iban kan mačči anagar ifurguyen n tumnayt ara yernun di ssuma, imi ula d isufar imecṭah, ad rnun seg tama-nsen, akken diɣen ara rnun yisufar n wučči, igumma d yizegza. Ad yettwawwet uɣerman s teqṣeḥ ɣer lǧib-is. Annect-a iban kan ad d-yeglu s wurrif meqqren deg wussan i d-itteddun, ladɣa s tuɣalin n tikliwin n lǧemɛa d leḥris ara yeg ugdud ɣef udabu akken ad yuɣal ɣer deffir deg leryuy ineggura yettwaddmen. Aṭas n yizzayriyen i iwalan belli adabu n tmurt n Lezzayer, mazal yeṭṭef di leɛwayed-is. Seld mi d-yella usali n uselway amaynut, aṭas i iḍemɛen ad beddlent tlufa ɣer wayen yelhan, maca annar yessebgen-d ayen-nniḍen: D ismawen kan i ibeddlen, wama tasertit d yiwet-is. Imi deg tallit-a kan n tlata wagguren n ukman, yesɛedda udabu tid ur nettɛedday. Ifuṛes tagnit n unfafad n covid-19 i iḥebsen imdanen deg yixxamen, yeḥbes umussu aɣerfan, gan igrawen n yikabaren n FLN d RND, ttwaṭṭfen kra n yimeɣnasen ɣer lḥebs, akken diɣen i sɛeddan kra deg-sen sdat n teɣdemt war ma ḥeḍren yibugaṭuyen-nsen. Taneggarut, d asali n sswami-a n lmazut, ara d-yeglun s tmerniwt n waṭas n yisufar-nniḍen. War ccek diɣen, d tin ara iceɛlen times deg wulawen n yizzayriyen.
Khaled Achoui