Accueil Tamazight Ad tettwafures tmerrit deg umazzer n Kefrida, ahat ?

Tasexriwt

Ad tettwafures tmerrit deg umazzer n Kefrida, ahat ?

33

Aṭas-aya segmi yekker wawal ɣef usnulfu n kra n uqeddic i ubaɣur n tmerrit di tɣiwant n Tsexriwt, i yeggugen s wazal n 55 n yikilumitren ɣer Unẓul-asamar n waɣir n Bgayet. Yettwabdar-d waya abeɛda ɣef wayen yerzan amazzer n Kefrida, imi aql-it d amḍiq amezwaru di temnaḍt iɣer i d-rezzun waṭas n yimerrayen, ama deg unebdu i uɛumu, neɣ deg tsemhuyin-nniḍen i tmuɣli d tukksa ɣef wul. Ula d imezdaɣ n tɣiwant-a n Tsexriwt, acḥal-aya tura segmi ttraǧun kra n usenfar ara yefken udem yelhan ugar i yimazzaren n Kefrida, d acu, ur d-yuɣal uwellih ɣur-s deg wayen iɛeddan sɣur yimḍebbren n tɣiwant d wid n twilayt. Yezmer yiwen ad d-yini aya, imi ula d abrid n tkerrust i yessawaḍen ɣer umazzer-a, ur yesɛi kraḍ n yiseggasen segmi yemmug akken ilaq. D ayen i yeǧǧan zik inehharen cektayen ɣef waddad n ubrid-nni i yettawin ɣer umkan icebḥen am winna. Yewwi-d ad d-nesmekti d akken ula d lwali n Bgayet, Mass Ahmed Maabed, yesseḥres ɣef tikti n usnerni n tmerrit deg umazzer, deg tirza i t-id-yewwin taggara-a ɣer tɣiwanin n usamar n Bgayet, gar-asent Tasexriwt d Ayt Smaɛel. Mi iɛedda ad iḍil ɣef umazzer n Kefrida, yehwa-as ayendin umḍiq-nni n tmerrit armi yessuter deg uselway n tɣiwant n Tsexriwt, Mass Maǧid Buǧiṭ, ad yeg akk ayen ilaqen i uḥraz n wadeg-a, d usebɣes n warmuden yelhan deg-s i ujbad n wugar n yimerrayen yal aseggas. « D ayen ilaqen ad yili akken ad as-yettwar wazal i umazzer n Kefrida. Nessaram ihi ur yettɣimay ara d awal kan usenfar-a », i d-yenna yiwen n umezdaɣ n Tsexriwt. D ayen ara d-ibinen dɣa i yiɣermanen n tɣiwant-a deg wayyuren-a i d-iteddun.

M. K.