Accueil Tamazight Ad tettwaseqdec tmaziɣt deg yal tasga n uwanek

Merruk

Ad tettwaseqdec tmaziɣt deg yal tasga n uwanek

59

Telḥa tutlayt n tmaziɣt asurif meqqren ɣer sdat s uḥelli-ines i uzref n useqdec n tutlayt n Yimaziɣen n Lmerruk deg yal tama n tmurt d yal tasuddut tunṣibt i ileḥḥun di tmurt.

Mbeɛd isalli i d-yeffɣen ass n 10 yunyu 2019 s lvuṭ n yimazanen (les députés) n Merruk ɣef usaḍuf i d-yeqqaren ilaq ad yiwsiɛ usemres n tmaziɣt u ad yili deg yakk akal n tmurt. Tazwara, deg tdebliwin d yiɣerbazen, syin ad yaweḍ ɣer tsuddiwin-nniḍen.

Deg uḍris i d-yeddan deg usaḍuf; “Imerrukiyen zemren ad d-ssuffuɣen leɛqud n tissulya, tikarḍiwin n tumast, ttesriḥ n yinig d tkarḍiwin n tenhart s tutlayt n tmaziɣt”. Aquddim-nniḍen daɣen i yesferḥen buhan Imaziɣen, d akken ad yili uselmed n tutlayt-nsen deg yakk iswiren n uɣerbaz u deg merra akal n tmurt n Merruk.

Deg teɣdemt daɣen, ad yili usemres-ines deg yiskasiyen i d-yettilin din. Ula deg yibeyyiten n lbanka d yidrimen, ad tili tmaziɣt deg-sen, dima ɛlaḥsab n uḍris-a i d-yeddan deg usaḍuf. Annect-a merra i d-nebder, yettuneḥsab d tarnawt, ma d tidet ad yessers udabu azref-agi n Yimaziɣen deg unnar, ad t-yeḍfer s telqey deg yal taɣult. S wakka, nezmer ad d-nini tamaziɣt telḥa aḥric meqqren deg tikli-s. Akken ara yili d abaɣur i Yimaziɣen n tmazɣa d wid n tama-a ladɣa, imi ad izmiren ad smersen tutlayt-nsen war akukru deg taɣulin merra, ad yesnerni lebɣi-nsen deg ufaris s tutlayt-nsen.

Dge yiwet n teɣbalut taddadant n leḥsab i d-yellan deg useggas n 2004, teqqar-d belli 8 n yimelyan n Yimerrukiyen, yeɛni 25 % n yimezdaɣ n tmurt-a, ttutlayen yal ass yiwet gar kraḍ n tantaliwin timaziɣin n tmurt. Isalli-a ad yili ayɣer ala, d tamsirt i yiduba n tmura-nniḍen timaziɣin, ladɣa tamurt n Lezzayer d tin n Tunes. Acku asaḍuf neɣ aḍris unṣib n uwanek yuḥwaǧ asrusu-ines s tidet deg unnar. Mačči akken i d-yella deg tmurt n Lezzayer deg useggas n 2016, mi tuɣal tmaziɣt d tutlayt tunṣibt, maca ulac ayen i d-iḍefren ayagi di tilawt, imi d aɣebbar s allen.
KH. A.