Ass n ssebt, 17 ɣuct 2018, ad tebdu tedwilt tis 8 n tmeɣra n ukermus, ara d-yilin deg taddart n Saḥel. D ttiɛad ara yeddun ɣef teɣzi n 3 wussan, imi ad temdel tiwwura-s seldazekka-in n letnayen 19 deg waggur-agi ideg nella. Deg tezrigt n useggas-a, yetturaǧu ad yili usenɛet n waṭas n tewsatin (leṣnaf) n ukermus n tmurt n Leqbayel, d wayen yakk i d-ittekken seg-sent. Ad ilint diɣ waṭas n temsikniyin-nniḍen, yecban: tamemt, taqendurt, lfeṭṭa. Am wakken diɣ ara d-yili usenzi s ubuddu n yidlisen sɣur ddeqs n yimura ara d-yerren i teɣri n tddukkla “Saḥel”.
Ad d-ilin diɣ tmeɣriwin n ccna, turart n tmezgunin akked yisaragen deg wahil i d-yettwaheggan bedemma i wannect-a. Ad tili tmeɣra-agi, s lemɛana gar Useqqamu aɣerfan n lwilaya n Tizi Uzzu, Aseqqamu aɣerfan aɣiwan n Buzgan, Tanmehla n yidles n lwilaya n Tizi Uzz, Tiddukkla tadelsant “Saḥel”, Taseqqamut n taddart-agi n Saḥel. Ad d-nesmekti kan, belli ussan-agi kan iɛeddan i d-tella deg taddart-agi tfaska tagraɣlant “Siwel-d Tiẓuriwin”, i d-yellan si 19 alamma d 26 yulyu 2019.
A. Gh.