Letnayen-agi sdat-nneɣ, ɣef 10h00 n ssbeḥ, ara tebdu s wudem unṣib tezrigt tis ukkuẓet n Rreḥba n udlis i lmend n warrac imecṭaḥ deg Uxxam n yidles Lmulud At Mɛemmer n Tizi Uzzu.
Ad tili gar 02 d 07 cutember i diteddun. Ad tili rreḥba-agi deg 5 n yimukan n yidles d tmussni deg wakal n lwilaya n Tizi Uzzu yecban: Axxam n yidles Mulud Mɛemmeri d tneḍfart-is n Yiɛeẓẓugen, Tamkerḍit tagejdant n tɣuri taɣerfant, Axxam n umezgun amniḍan Kateb Yacine, Tazeqqa n ssinima.
Am wakken ara d-ilin yirmad deg yimukan-nniḍen yecban timkerḍiyin n tɣiwanin, tizeɣwa n tɣuri…atg. Yettwahegga-d yiwen wahil d amerkanti, ideg ara tili rreḥba n yidlisen (timsikniyin sɣur ugar n 20 n yixxamen n tezrigin n yidlisen, d yisenza s yibuddan sɣur waṭas n yimura, ladɣa wid yettarun i warrac), ama deg Uxxam n yidles ama deg tneḍfart-is n Yiɛeẓẓugen neɣ deg Temkerḍit tagejdant n tɣuri taɣerfant, seg 09h00 n ssbaḥ alamma d 16h00 n tmeddit ɣef teɣzi n setta wussan, d usenɛet n yimuhal n yiskiwen n wulmisen-agi.
Am wakken ara d-tili tullsa n 4 n tmucuha deg tzeqqa-nni yellan deg Uxxam n yidles, yettwassnen s yisem “Axxam-nneɣ”, ad yili diɣ di temkerḍit tagejdant. Ad ilin diɣen waṭas n yisikwan (uraren isegmiyen, asuneɣ, ccḍeḥ, tira, taɣuri…atg.) deg temkerḍt-agi tamaynut akked temkerḍit taqburt n Uxxam n yidles. Ma deg Tzeqqa n ssinima, ad yili uskan n 5 n yisura n yigerdan, yal ass ɣef 13h00 n uzal, gar-asen: “Ponyo sur la falaise”, “La colline aux coquelicots”, “La princesse Mononoke”…atg. Ula deg Uxxam n umezgun Kateb Yacine, ad tili turart n tmezgunin-a: “Agrud bu snat tyemmatin”, akked “Agrud ungif”.
Am wakken diɣen ara d-yili usenzi n yidlisen iɣurbizen, yerzan aɣerbaz amezwaru, aɣerbaz alemmas akked tesnawit, sɣur Ddiwan aɣelnaw n usizreg aɣurbiz (ONPS), mebla ma nettu timsizzelt yettwaheggan i warrac. Ad ilint diɣ tirza ɣer yiɣerbazen n lwilaya deg wass amezwaru n tuɣalin. Am wakken diɣ ara d-yili wahil n tuqribin seg 02 alamma d 05 cutember, ama deg Wammas adelsan Matoub Lounes n Ain El Hammam, ama deg Wammas adelsan Krim Belkacem n Yiɛeẓẓugen, ɣer tama n temkerḍiyin n tɣiwanin d waṭas n yimeḍqan-nniḍen. Ula d ahil n tuqribin-agi, ad yili d anesbaɣur, gar temsikniyin, isikwan, timezgunin, tuffɣiwin…atg. Ass n 07 seg waggur n cutember i d-iteddun, ɣef 14h00, ad d-tili tmeɣra n taggara deg Temkerḍit tagejdant n Tizi Uzzu, ideg ara ttunefken yigerdasen n uttekki i yimekkiyen deg tfaska-agi, tukci n yidlisen n yigerdan yeqqaren deg yisikwan n temkerḍit-a, ara yessalin dɣa ass n lexmis, 07 cutember 2019.
Ɣer taggara, ad d-nesmekti belli leqdic-a, thegga-t Tenmehla n yidles n Tizi Uzzu akked wulmisen n yidles, yecban: Axxam n yidles Lmulud At Mɛemmer d win n Krim Belqasem n Yiɛeẓẓugen, Axxam n umezgun amniḍan n lwilaya, akked Temkerḍit tagejdant n tɣuri taɣerfant s uttekki n Tenmehla n usegmi aɣelnaw, Ddiwan aɣelnaw n usizreg aɣurbiz (ONPS), amussu addukklan n lwilaya n Tizi Uzzu…atg.
Adaoun Abdelghan