I lmend n Tfaska n tezlit tamaziɣt i d-yellan ussan iɛeddan di Bgayet, nesteqsa Mass Yasin Zidan ɣef ddeqs n tlufa, yerra-aɣ-d.
Aɣmis n Yimaziɣen : Amek tɛedda s umata tfaska n tezlit tamaziɣt?
Yasin Zidan : S umata tgerrez, ɣas nebda s wuguren deg tazwara, maca Tafaska tis 17 teggeɛmer seg wass wis sin armi d ass n taggara imi i d-ḥeḍren ugar n 55 alef n yimdanen deg teɣzi n tfaska-a. Annect-a mačči d rray-iw kan nekki, maca d rray n yicennayen imeqqranen i d-yerzan akked rray n yinaẓuren d yimdanen i d-yusan s waṭas. Daɣen, ad nzux imi deg teɣzi n 5 n wussan ur d-yeḍri ara umyekčaw deg tfaska-a, ayen i yunfen i twaculin ad d-rzunt yal iḍ ugar n yiḍ yezrin. Ttawilat merra i d-nheyya, yunef ad tezri tfaska s talwit, imi ugar n 300 d aqeddac gar wid yellan d iɛessasen, d itikniyen, d ineɣmisen, d imewlafen. Ula d taɣamsa, terza-d s waṭas imi d-ḥeḍren waṭas n yiɣmisen, rradyuwat akked 18 n tregwa n tiliẓriyin ideg llant 4 n tmura taɛrabin.
Mmeslay-aɣ-d ɣef yiswan n tfaska-a d wamek i d-tella tarrayt n ufran n yitran n uzekka?
Iswan n tfaska ugten. Nebɣa ad nesseḥbiber ɣef tẓuri-a n ccna i ḥemmlen s waṭas Yimaziɣen, daymi i nerra tajmilt i unaẓur ameqqran Karim Tiẓuyar i d-yesuffɣen i ddemma n tfaska-a tasfift-is taneggarut mbeɛd 9 n yiseggasen. Daɣen, tafaska-a, nebɣa-tt ad tili d annar n usuter n tlelli i yimeḥbas yettwaṭṭfen ɣef wannay amaziɣ, daymi i asen-nbud tafaska-a. Ma d iswi agejdan n tfaska-a, d aleqqem n ccetla akken ad kemmlen abrid i ḍefren yimeqranen n ccna n tmaziɣt am Yidir, Ayt Mengellat, Takfarinas, … I lmend n waya, tella-d temsizzelt deg unammas aɣelnaw n tegmi deg yidles d tutlayt n tmaziɣt i aɣ-d-yefkan axxam-is, daymi ara snemreɣ Mass Mustapha Tidjet, i yellan qbel n beddu n tfaska ɣer tama-nneɣ. Deg tiremt tamezwarut myezwaren azal n 60 n yilemẓiyen deg teɣzi n 5 n wussan, syin tefren-d teseqqamut n uktazal iɣef d-yella i lmendad Mass Mohand Ait Ighil 8 n wufriyen i yesfayden s yiwen n usileɣ i idumen 5 n wussan ɣer yiri n tfaska.
Nwala aṭas i yezzin d ameslay send tafaska, armi i d-tenniḍ llan wid yebɣan ad ssamren ɣef tfaska. Amek tella taluft?
D tidet, llant kra n medden i yebɣan ad ḥebsen tafaska-a n ccna n tmaziɣt akken ur d-tettili ara, yal tikkelt deffir n wacu i ttefren. Tikwal d tallit n umussu “lḥirak”, tikwal d iberdan ur nettwaseggem, tikwal ttefren deffir “ccṭiḥ werdiḥ”, tikwal-nniḍen d idrimen ur nlaq ara ad ttwaserfen ɣef yidles”… Lḥasun ssebbat qwant, iswi-nsen yiwen ! Dɣa qqaren-d belli d ibgaytiyen i yugin tafaska-a. Syin, mi d-kkren wat wawal d yimeɣnasen n tmaziɣt, uɣalen-d lɣaci d twaculin ttasen-d s waṭas, d ayen i idemmren “imdanen-a yessexraben” ad negren.
Akken neẓra daɣen, llan wid ur nebɣi mi tettekkay deg-s tɣiwant n Bgayet s waṭas n tedrimt deg wadeg ara teg isenfaren-nniḍen. D acu d awal-ik ɣef waya?
Taɣiwant n Bgayet, tettɛawan tiddukkliwin yesɛan isenfaren n tmetti, aselway n Useqqamu n tɣiwant n Bgayet Mass Ḥusin Merzugi d yiwen n umeɣnas ameqqran n tmaziɣt. Aseggas-a mačči ala taɣiwant i yekkin deg tuddsa-ines maca ugtent tsudduwin i yellan yid-neɣ. Taɣiwant n Bgayet, tettak tadrimt daɣen ula i trebbaɛ timeqqranin n waddal n Bgayet, ihi ilaq ad neḥbes tilɣuɣa n ddabex uḍar d win n tegnaw? Taɣiwant n Bgayet, tella-d i lmendad n wayen i iḍerrun merra d ineḍruyen : addal, idles, timetti, … Ur ilaq ara ad nessexleḍ timsal.
Yaḍra tettxemmimem i usnulfu n kra n umaynut di tfaska-a ɣer sdat?
Sya ɣer kra n wussan, ad nesbed taseqqamut n uheyyi n tfaska tis 18 i nebɣa ad tili d tagraɣlant, daymi i nebɣa ad nebnu ɣef llsas iseḥḥan. Ad tili tfaska i d-iteddun, d tafska n ccna d yidles amaziɣ ideg ara kkint tmura n Tmazɣa. Aṭas n tɣawsiwin timaynutin ara yilin i lmendad n waya. Sya ɣer wussan i d-iteddun, ad awen-id-nefk amaynut.
Tanemmirt. Awal-ik n taggara…
Ahat d asnemmer kan n wid merra yenɛettaben akken ad tufrar tfaska-a. Tanemmirt i Mass Merzugi, lmir n Bgayet, Mass Tidjet, anemhal n Unammas n tegmi, Mass Assad amaray amatu n Useqqamu unnig n timmuzɣa, i Mass Bencix n l’ONDA, d wid merra i d-yefkan afus n tallelt. Tanemmirt daɣen i kečči d Uɣmis n Yimaziɣen d wid merra yellan yid-neɣ. Tilelli i yimeḥbas n wannay amaziɣ.
Yesteqsa-t M. K.