Ass-nni n lexmis, 31 deg tuber 2019 i yelli uneɣlaf n teɣwalt, Hassane Rabehi, s wudem unṣib tezrigt tis 24 n rreḥba taɣraɣlant n udlis n tmurt n Lezzayer, yettwassnen s yisem n SILA. Tazrigt-agi tamaynut, ad ilin deg-s wazal n 183.000 n yizwal. Ma d tikkelt-agi fernen yimsuddsen n rreḥba-agi tamurt n Ssinigal, i d-yellan d tinebgit n lḥerma, i d-yewwin yid-s ugar n 200 n yiwudam n tsekla, n umezruy, gar tezrigin d yimura. Ma ɣef tḥawact n tezrigt n useggas-agi, ttekkint deg-s ugar n 900 n tezrigin, gar tid n tmurt n Lezzayer d tezrigin-nniḍen i d-yerzan seg wazal n ddeqs n tmura tiberraniyin.
Azal n 300 000 n yidlisen s tutlayin yemgaraden n umḍal; Tamaziɣt, Tafransist, Taɛrabt, Taglizit, Talmanit…atg, i la d-yettwasenɛaten ɣef teɣzi n 11 wussan, ara tekk rreḥba-agi. Am wakken daɣen i ttilin leqdicat-nniḍen, gar tejmilin meqqren, isikwan, isaragen, timliliyin tiseklalin…atg, ara d-yawin awal ɣef wayen icudden merra ɣer udlis s umata. Fkan daɣen yimsuddsen n leqdic-agi, tagnit i ddeqs n yimura ilmeẓyen izzayriyen i wakken ad sneɛten idlisen-nsen imaynuten i umaḍal merra. Ddeqs n yimura imeqqranen n tmurt n Lezzayer ara yilin dinna, i wakken ad budden idlisen-nsen i yimeɣriyen-nsen. Ad teddu tezrigt-agi, ɣef teɣzi n 11 n wussan; imi tebda ass-nni n lexmis, 31 tuber 2019, ad tessali ass n ssebrt, 09 deg unbir 2019. Yal ass, ttilint-d temsikniyin si 10h00 n ssbeḥ alamma d 19h00 n tmeddit, deg Yiɣrem n temsikniyin n Lezzayer Tamaneɣt.
Ghani Amazigh