Accueil Tamazight Ad ttwaferqen 2 800 n yiqerban ɣef yinelmaden n uswir amenzu

TIMIZAR - D taɣiwant i d-yelhan s yigerdan yenxessen

Ad ttwaferqen 2 800 n yiqerban ɣef yinelmaden n uswir amenzu

34

I lmend n tuɣalin n yinelmaden s aɣerbaz, i yetturaǧun ad tili larebɛa-agi sdat-nneɣ, ttnernint tmehliwin n tallelt i yinelmaden yenxessen. Yettili-d waya sɣur tiɣiwanin, iseqquma n lwilaya neɣ aggur azeggaɣ…atg. Tikkelt-agi di tɣiwant n Timizar, yettabaɛen ɣer daya n Wagennun d Useqqamu aɣerfan aɣiwan (A.P.C) ara iqablen iqerban ara yettwaferqen ɣef yinelmaden ixussen. Ɛlaḥsab n wulɣu i d-yesuzer uselway n tɣiwant-agi, Mass Ǧewadi Lwennass, i d-yennan belli ad yili ufraq n wazal n 2 800 n yiqerban d yifecka n ulmud (tizmamin, imruyen d wayen-nniḍen), ɣef yinelmaden n uswir amezwaru, yettwaferqen ɣef 17 n yiɣerbazen imenza yellan di tɣiwant-a.

Yessegza-d deg-s uselway n tɣiwant ɣef ubrid swayes zemren ad d-awin yinelmaden-agi iqerban-nsen, imi ilaq fell-asen ad qerben ɣer uniraw n unemhal n uɣerbaz ideg ara ɣren, i wakken ad ten-id-awin. Am wakken diɣ, i d-yefka taḥawact n tuɣalin n useggas-a aɣurbiz 2019/2020, ideg jerden 3 445 n yinelmaden n uswir amenzu, gar-asen 445 d inelmaden imaynuten, ara yeɣren deg useggas n uheggi. Ɣer taggara n wulɣu-a, iger-d tiɣri Mass Ǧewadi Lwennas, ideg yessuter deg yimawlan n yinelmaden-nniḍen ixussen, ur nettwajerd ara deg wumuɣ-agi n 2 800 n yinelmaden, ad d-rzun ɣer unemhal n uɣerbaz ideg ara iɣer mmi-s neɣ ad yerzu ɣer tɣiwant.

I usmekti kan, iqerban-agi d yifecka-a n uselmed iseg ara d-stafden yinelmaden-agi, ttwaferqen yakan deg taggara n waggur yulyu ɣef 17 n yiɣerbazen imenza yellan deg tɣiwant-a. Ula deg tɣiwant n Makuda, yettabaɛen ɣer dayra n Makuda, ad yili uqabel n yiqerban n yigerdan yeqqaren deg yiɣerbazen imenza n tɣiwant-a. Yal anelmad s uqrab-is, merra inelmaden n uswir amenzu ad awin iqernan-nsen deg wussan imenza n tuɣalin-a.

A. A.