Ɣas akken ɛeddan qrib kraḍ n yiseggasen segmi i d-iberreḥ uneɣlaf amenzwaru s tuɣalin n tutlayt n tmaziɣt d tunṣibt, maca leqdic deg unnar, ixuṣṣen nezzeh.
Abrid tura i yebda i tikli, imi aṭas n uxeddim i yurǧan akken ad d-tbin tmaziɣt d tidet d tutlayt tunṣibt deg unnar. Dɣa ussan-a, tceyyeɛ yiwen n lamer teɣlift n daxel i yiqerra n lwilayat, akken ad d-tili tira s tutlayt n tmaziɣt i teplakin tiwilayin timeqqranin i d-iḥerren tilisa gar twilayt d tayeḍ (tid i d-yettmagar umdan mi ara yekcem deg wakal n twilayt). Deg tebrat i yuzen umaray amatu n teɣlift-a, Ṣaleḥ Ddin Deḥmun, ass n 27 duǧember yezrin, yessuter deg-sen ad gen leqdic iwulmen i ccɣel-a, ad bdun seg tura i uheggi n usenfar-a unṣib deg yakk aɣiren n tmurt, seg 12 yennayer 2018. Annect-a ad yili i lmend n usfugel n yennayer, ixef n useggas n yimaziɣen. Deg umeslay n umazan, yenna d akken leqdic-a amaynut yekcem gar tezwariyin (priorités), acku tura tamaziɣt tuɣal d tutlayt taɣelnawt tunṣibt seg useggas n 2016, ɣef waya yessefk ad yili uɣiwel deg leqdicat yecban wi. Ladɣa deg wayen yarzan asuɣel n teplakin n usnubget neɣ tideblanin.
Deg lamer-a yettuceyɛen, ddan-d akk yismawen n twilayin d twilayin tinesmigalin (délégués) ttwarunt s tutlayt n tmaziɣt. Maca, ar tura ur neẓri ara s wanwi isekkilen ara yili ccɣel-a, ma yella s yisekkilen n tfineɣ akken i yennum useqqamu unnig n timmuzɣa yetteg s lemɛawna akked tdeblin timatuyin, imi yella-d yakan usuɣel n waṭas n teplakin ɣer tmaziɣt s yisekkilen-a n tfineɣ. Neɣ wissen tikkelt-a, ma yella s yisekkilen n tlatinit, i yettwasemrasen ass-a deg tuget n tirawin yettilin s tmaziɣt, ama deg tesdwiyin, deg yiɣerbazen, neɣ deg yidlisen n tmaziɣt i d-yetteffɣen.
Khaled Achoui