Accueil Tamazight Ad tuɣal tejmilt i Anissa

Udem gar wudmawen

Ad tuɣal tejmilt i Anissa

30

Deg ukemmel n tfaskiwin n tmedyazt d tejmilin i yettuɣalen i yinaẓuren deg tmurt n Leqbayel, ad d-theggi tddukkla tadelsant “Anegmu” n taddart At Sɛada deg Sidi Ɛli Bunab taẓrigt tamezwarut n tfaska taɣelnawt n usefru amaziɣ iwumi fkan azwel n “Amedyez Iflisen Umellil”.

D tafaska ara d-yeḍrun seg 31 yulyu ar 4 ɣuct 2019. D tajmilt ara yuɣalen s tfaska-a i tnaẓurt Anissa i d-yelḥan yiwen n umecwar igerrzen di tẓuri. Segmi tella d tilemẓit i tekcem ɣer umaṭtaf wis sin akked wudmawen iqdimen yettwassnen deg tẓuri d yidles n teqbaylit. Anissa, d tin i d-yesduklen ɣef teɣzi n umecwar-is gar ccna, ssinima d umezgun.

Ma ɣef yisuḍaf n tikkin di tfaska-a, yessefk ɣef yimedyazen ad aznen kraḍ (3) n yisefra s tmaziɣt yettwarun s usekkil alatini, ɣer tansa talikṭrunit association.anegmu@gmail.com, send 15 yulyu 2019, ad seddun deg usebter i yiman-is isallen-a: Isem, azemz d wadeg n tlalit, uṭṭun n tilifun. Imekkiyen, yessefk ad sɛun nnig n 16 n yiseggasen. Ma d taseqqamut n yinẓurfa, ad ilin deg-s yimedyazen d yisdawanen n ugraw Amedyez.

I wugar n yisallen, siwlet ɣer wuṭṭun 0550 22 00 16. Sya ar yimir, s umedyez ad d-nettmlil deg Yiflisen Umellil. Tafaska-a, d tagnit akken ad mlilen yimedyazen ad seqredcen timsal, daɣen d tagnit i usekfel n yimedyazen imaynuten yuɣen abrid n usefru. Ad Gen yimsuddsen n tfaska-a, tazrigt-a tamenzut d tajmilt i tzeffant d tnaẓurt tameqqrant “Ourida Mezaguer” yettwassnen s yisem n “Anissa”, i yefkan aṭas i ssinima d tezlit taqbaylit, am wakken daɣen tettcebiḥ isura ideg i d-turar, amedya: Axxam n Dda Meẓyan, Itij n Zira, Tawrirt yettwattun…atg. Yetturaǧu, ad yili wahil d anesbaɣur deg tfaska-agi, gar temsizzelt n tmedyazt, timsikniyin, ameslay ɣef tmeddurt d umecawar n llal n tejmilt Anissa…atg.
Kh. A./Gh. A.