I wakken ad d-afen tifrat i uɣbel n yiselmaden yellan deg umuɣ n tmeṛjiwt ( liste d’attente ), nnejmaεen yimutlayen( porte-paroles ) n yiselmaden-a, akked yimasayen n uɣlif n usegmi. Ayagi imi ddeqs n yiselmaden i yettεassan ad asen-d-ssiwlen, meεna ur d-iban kra. Ama d wigad n uswir amezwaru, i d-yeffɣen deg useggas n 2018 neɣ d wid n uswir alemmas akked tsenawit, i d-yeffɣen deg useggas n 2017. Rnu ɣer waya, ɣef leḥsab n yimutlayen n yiselmaden, llan imukan ideg xuṣṣen yiselmaden. Meεna imḍebbṛen n tenmehliwin n usegmi, ur d-ssawlen ara.
Seld amciweṛ gar yimutlayen n yiselmaden d yimasayen n uɣlif n usegmi, ineggura-a, nnan-asen-d belli ad ḥebsen asiwel i yiselmaden n umuɣ n tmeṛjiwt, seld 31 duǧember 2019, imi acḥal-ayagi segmi i d-yeffeɣ umuɣ-a. D ayen i yeǧǧan iselmaden i yellan sεan asirem ad xedmen, yeffeɣ-iten leεqel, ladɣa imi aseggas-a meḥsub yekfa. Seg tama-nniḍen, llan wid yumren s teɣtest-a, ladɣa inelmaden i d-yeffɣen seg tesdawit ur ufin ara axeddim. Acku ad asen-tettunefk tegnit ad tekkin deg temsizzelt i d-iteddun.
Ad d-nesmekti d akken iselmaden-a i rebḥen deg yiseggasen n 2017, 2018, ur qbilin ara s ṛṛay-a n yimasayen n uɣlif n usegmi. Ɣef waya i refden ula d nutni taɣtest belli ad uɣalen ɣer tikliwin, d yinejmuεen sdat n tenmehliwin n usegmi armi d ass ara d-rren i wayen i ssuturen. Ladɣa imi di lawan-a ideg nella, ssuturen akk abeddel, bɣan ad d-rren izerfan-nsen i iruḥen. Γef usentel-a, tenna-aɣ-d yiwet n tselmadt : “sin n yiseggasen-aya nekk ttεassaɣ ad i yi-d-ssiwlen, yal mi ara rzuɣ ɣer Tenmehla n Bgayet, qqaṛen-iyi-d ulac imukan, nekk di taddart anda i zedɣeɣ llan yimukan. Daymi i zriɣ belli kullec s tmussni, ihi d awezɣi ad nessusem ɣef uzref-nneɣ i ṛuḥen”.
K. K.