Addal d yiwen n uḥric yesɛan azal ɣer umdan, imi yettɛawan-it ad yerfed tafekka-ines, ad yessebɛed aṭṭanen akked ubaɣur swayes i d-igellu i kra n yilɣuɣen i d-yettarran tadrimt. Llant kra n twaculin, bdu-tt seg ubabat, tṣubbeḍ-d akken ɣer tarwa-s, ad ten-tafeḍ ḍefren yiwen n waddal, wa yettaǧǧa-t-id i wa, ama s leḥmala, ama s tukci n Rebbi. D akka i teḍra d twacult Ouaras yettidiren deg Wehran, imi yettuneḥsab waddal n lɛum d tazwart (priorité) iɣef ur zmiren ara ad beɛden, acku ddeqs n yilɣuɣen i d-tefka twacult-a taqbaylit i waddal-a.
Ma nebder-d kan Muḥemmed Rasim d Ranya i iḍefren tikli n baba-tsen Ɛellawa. Dɣa deg tmeɣra i d-yellan ussan-a deg uzaduɣ n El Bahya s uneḥḍur n yimasayen n twilayt, tella-d tririt n tejmilt i twacult Ouaras ɣef wayen i d-fkan i waddal n lɛum u mazal ttmuddun-d, ladɣa aseggas yezrin 2018. Muḥemmed Rasim, yesɛa 16 n yiseggasen kan di leɛmer-is, yerbeḥ talɣuɣa n yimecṭaḥ n tmurt n Lezzayer ɣef 1 500 n lmitrat n lɛum ilelli di tmanaɣt. Ma d uletma-s Ranya, 14 n yiseggasen, tuɣal-d seg Ɛennaba s sin n warrazen n wureɣ deg 100 d 200 n lmitrat n lɛum ɣef wammas. Akken diɣen i d-terna kraḍ n warrazen deg talɣuɣa taɣelnawt i d-yellan deg temdint n Tlemsan ɣer yimecṭaḥ maḍi (minime).
Ma d baba-tsen 55 n yiseggasen, d netta i asen-d-ineǧren abrid, mazal-it ar tura iqeddec deg waddal-a n lɛum, ddeqs n warrazen i yewwi ladɣa asmi yella d ilemẓi. A-t-an imir-a, yettekki ɣer terbaɛt n usedwel anaddal n Ɛin Tturk iɣef yella i lmendad usleɣmay Butbina Anwar, ma d netta d amɛiwen-is. Mi t-nesteqsa ɣef sser yeǧǧan tawacult-is ad d-tufrar deg waddal-a, yenna-d “Ulac kra n sser yeffren, tamezwarut d nekk i yebdan s leḥmala n waddal n lɛum dɣa ufrareɣ-d, syin arraw-iw mi i yi-d-ẓran akken, ɣetsen ad uɣalen am nekk neɣ ugar”. I usmekti, tadra n twacult-a seg Tizi Uzzu.
Khaled Achoui