Accueil Tamazight Adlis-nniḍen ɣef Meɛtub Lwennas

Ajdid deg tira : Adlis-nniḍen ɣef Meɛtub Lwennas

295
- PUBLICITÉ -

Seld kra n yidlisen i yettwarun ɣef ugrawliw Lwennas Meɛtub, abeɛda wid n Yala Seddiqi, Muḥemmed Gaya, Nadya d Malika Meɛtub, a-t-an yessufeɣ-d ussan-a kan Mass Ṭeyyeb Iqubac, neɣ Ɛebdelli s yisem adeblan, yiwen n udlis d amaynut s uzwel « Matoub Lounès, notes et souvenirs d’un compagnon de lutte », ɣer teẓrigin Fauves éditions n Paris. Deg wugar n 170 n yisebtar i tegber, yewwi-d umeskar deg tektabt-a aṭas n tnagiwin ɣef Lwennas Meɛtub, ayen yedder yid-s d wayen ur d-yenni fell-as ar tura. Maca daɣen, ɣef wawal n bab n udlis, ad yaf yimeɣri tidet yerzan kra n tedyanin d wugar n tafat ɣef wayen ur nban ar tura akken ilaq i wid iḥemmlen anaẓur-a aɣewwaɣ, i d-yesɛeddan akk tudert-is d amennuɣ, akken yenna deg yiwet seg tezlatin-is: “Imi i d-luleɣ d Aqbayli, isem-iw imenɣi”. Dɣa, nezmer ad nɣer aya s tefransist, deg tduli n berra n udlis: « Lwennas yella dima d aliketrun ilelli, neɣ ugar n waya. Tella d ssebba, war ccek, i t-yeǧǧan yettban-d am wakken d amdan-nni ur bɣin di tmurt-is ɣur kra n yigrawen isertanen, n tddukkliwin i d-ilulen deg tnekkra taqbaylit-tamaziɣt n 20 yebrir 1980, d waṭas n wudmawen idelsanen akked yinaẓuren i yettwaḥesben d imḥaddiyen ». Ihi, ɣas ini yefka-d umaru deg udlis-a, timentilin i yeǧǧan mmi-s n tewrirt Musa yuɣal, yiwen n wakud akken, rewwlen fell-as kra n yimdanen n tsertit neɣ n yidles. Ayendin d isteqsiyen iɣef yeɛreḍ umeskar ad d-yerr s wayen ixuleḍ Lwennas Meɛtub abeɛda, d wayen iwala, neɣ yettwali, deg unnar. Ayen yerzan asuffeɣ n udlis-a di Tmurt, yenna-aɣ-d Mass Ṭeyyeb Iqubac: « Aql-i walaɣ yiwen n umaẓrag di Tmurt. Yezmer lḥal ad t-id-yessuffeɣ deg wayyur i d-iteddun ». Ilul Ṭeyyeb Iqubac di Tewrirt Ɛemruc, di Bgayet, aseggas n 1953. Seg useggas n 1975, netta yettidir di Fransa. Yettwassen s temmeɣnest, s yisefra-s, d tdukli-is akked uɣewwaɣ.

- PUBLICITÉ -

M. K.

- PUBLICITÉ -