Yetturaǧu ad d-yeffeɣ deg wussan-a wungal amaynut n umyaru Omar Oulamara s usentel n “Agadir n Roma”, ɣer teẓrigin Achab. Akka i t-id-yenna dɣa bab n teẓrigin-a, Remḍan Achab deg usebter-ines n Facebook. D ungal ara d-yernun asurif-nniḍen i tsekla tamaziɣt yettaẓen ɣer sdat skud ttlalen-d yidlisen s lebɣi sɛan yimyura yecban Ɛumer Uleɛmara ɣer tira d tukci n wazal i umezruy d yidles amaziɣ.
Ɛumer Uleɛmara, yettwassen ladɣa s yidlisen icudden ɣer umezruy n yimaziɣen, imi ddeqs yakan i yura deg-sen u yessekfel-d aṭas n talliyin iɣef d-ɛeddan Yimaziɣen seg Rruman ɣer da. Yura 8 yidlisen, gar-asen “Iberdan n tissas, Tullianum, Taggara n Yugurten, Timlilit di 1962, Taɛrabt-Tineslemt n usekkak”.
Ungal n tikkelt-a, war ccek, aṭas diɣ n ubaɣur ara yaf yimeɣri deg-s, acku d win yesɛan azal. D asmekti, belli amyaru-a yeɣra tussna tafizikt, u yella gar yimeɣnasen imenza i yeɣran tamaziɣt ɣer Dda Lmulud di tesdawit n Lezzayer deg yiseggasen-nni n 70 ɣer tama n Muḥya d wiyaḍ. Ɣef wakken i t-id-yenna ihi Mass Achab, yetturaǧu ad yili udlis-a deg tazwara deg Tizi Uzzu, Bgayet d Lezzayer tamanaɣt ladɣa. Taɣuri igerrzen d ubaɣur yelhan i temkerḍit n wid ara t-id-yaɣen.
Kh. A