Seld abeṛṛeḥ n uselway n Useqqamu aɣerfan awilay, Mhenni Ḥeddadu, s umsizwer n taddart tazedgant, kkrent ddeqs n tuddar ara ittekkin deg umsizwer-a i usizdeg d ureqqeε n tuddar-nsen, gar-asen taɣiwant n Tsexriwt. Taneggarut-a, newwi-d yakan awal ɣef leqdic d uxeddim n warraw-is, ama deg uḥric n usizdeg, ama deg win n usendeh d uweṣṣi n yilemẓiyen i wakken ad ḥerzen tahuski n yimeḍqan d yimukan i yesεan azal ameqqran deg ccbaḥa n tɣiwant-nsen. Amedya amazzer n Kefrida, d win n Tẓebbucin.
Asendeh-a, yettili-d ladɣa sɣur yilemẓiyen iqeddcen deg tddukkliwin. Lameεna ass-a, rnu i warrac-a i yellan qeddcen, ula d imnaṣṣfen di leεmer, ddan akked ugraw-a, imi ula d nutni tura bɣan ad d-tufrar taddart-nsen gar tuddar-nniḍen, bɣan ad tizdig, ad tecbeḥ ugaṛ n tiyaḍ. Ayagi, yeǧǧa-ten, fkan-as i uxeddim ddḥis, s waṭas n tebɣest d tegmat. Cudden afus deg ufus, yal yiwen deg-sen, iεewwel ad yeṭṭef taqacuct. Ayen yeṣṣefṛaḥen ugar, d attekki n tlawin deg leqdic-nsen, s tgella i d-ttheggint yal ass i yixeddamen.
Ɣef usentel-a, yenna-aɣ-d yiwen n umezdaɣ n taddart n At Mbaṛek s teḍsa : « Tura, tuɣal d tamsalt n tismin, meεna akken qqaren imezwura-nneɣ, yelha win yesεan tismin n uεaned, am snat n teslatin tinuḍin, ta tebɣa ad tecbeḥ ugar n tayeḍ. Ihi d wagi i d addad-nneɣ, nettḥulfu ad d-nufrar d imezwura ». Seg tama-nniḍen, teddun lecɣal akken iwulem deg taddart n At Ɛli Umḥend. Ccil xussen ttawilat, meεna lebɣi n yimezdaɣ ur ten-yesseḥbes ara. D anemgal, xeddmen s wayen sεan. Ɣer taggara, yewwi-d fell-aɣ ad ten-nessebɣes ɣef lecɣal i gan, imi berzen iberdan, qeεεden taliwin, cebbeḥ-tent, sebɣen kra n yimukan. Ihi seg tama-nneɣ nessaram-asen afud igerrzen.
K. K.