Accueil Tamazight Aheggi i usenfar n usishel n uɛeddi i umeɛḍur

Tewɛer tudert n berra s tceryult

Aheggi i usenfar n usishel n uɛeddi i umeɛḍur

35

Neẓra akk amek tewɛer tudert n berra i umeɛḍur s tceryult-is, ama deg yidurar neɣ deg temdint. Imi sanda ma yerra, ad d-yemlil ugur ara as-yagin ad yaweḍ ɣer da neɣ ɣer din, d tiseddarin, d targa, d amdun neɣ d agerrac.

Ama weḥd-s neɣ akked umsaɛef-is. Tizdi n umeɛḍur deg tmetti, di tudert n yal ass, mazal-itt d awezɣi am yiseggasen iɛeddan. Ulamma yella usaḍuf deg Uɣmis unsib n tmurt, ulama yella-d kra n wayen yemmuggen sɣur tddukkliwin neɣ sɣur kra n yimḍebbren, wanag tallit-a tatrart tesbeggen-d belli ur d-yelli usemres n usaḍuf, ur d-yelli uxemmem ɣef taluft n umeɛḍur, ur as-yettunefk ihi wazal.

Ɣef uɣilif-a dɣa, ihegga-d, ussan iɛeddan, Useqqamu aɣerfan awilay n Bgayet (APW) yiwen n unejmuɛ lwaḥi d tddukkliwin i iqeddcen ɣef yimeɛḍar neɣ ɣef lxir, akken ad mmeslayen ɣef usenfar n usishel n wawwaḍ i umeɛḍur deg tudert n berra, am ɣer yisɣuren yemgaraden, ixxamen n uwanek, isensuyen, ulzuzen, atg.

Seld timlilit-a i d-yeḍran deg uxxam n Useqqamu aɣerfan awilay, mtawan yimeḥḍar ɣef kra n waqqayen iɣef ara yili uqeddic, gar-asen asefqed deg unnar ɣef wayen akk yellan d uguren. Aheggi n rrapul yettwafesslen ɣef wuguren yettwawfen deg unnar, akked usendeh n tsuda d termisin yemgaraden akken ad gent ɣur-sent ttawil n uɛeddi i yimeɛḍar. « Yeḥḍer seg tddukkla-nneɣ, deg unejmuɛ, yiwen seg yiɛeggalen.

Aqeddic-a d Aseqqamu aɣerfan awilay n Bgayet i t-id-yegren di ddhen-is. Nessaram ad yemmag s uzrab », i d-tenna tselwayt n tddukkla n yimiyupaten n Bgayet, Massa Nura Ayt Ɛebderreḥman. Ad d-nesmekti d akken ad yettwabudd usenfar-a n usishel n uɛeddi i yimdanen i ten-yuɣen di tfekka, i umiyupat Sufyan Arezqi, i aɣ-yeǧǧan ayyuren-a iɛeddan.

Dɣa, ɣef taluft-a n uɛeddi, yella yerza ɣur yiwen seg wid yellan d aɛeggal tura deg Useqqamu n twilayt, akken ad as-yefk kra n yisteqsiyen ɣef uɣbel-a, ad as-yessuter ad d-lhun yis-s ma yella rebḥen tifranin tisaḍufanin yezrin. Ugar n waya, yella Sufyan ixeddem irupurṭajen ɣef yimukan akk ideg ur xdimen ttawil n uɛeddi i umeɛḍur.

M. K.