Accueil Tamazight Aheggi n udlis ɣef Haman Abdellah

Wehran : Aheggi n udlis ɣef Haman Abdellah

61
- PUBLICITÉ -

“Ttɣibin wudmawen, ttɣiman-d yismawen”. Inzi-a nezmer ad t-id-nettɛawad deg waṭas n teswiɛin ɣef ddeqs n wudmawen yuklalen ad d-yettwabder yisem-nsen yal mi ara tettunefk tegnit i wayen-nni.

- PUBLICITÉ -

Ama d inaẓuren i d-yeǧǧan ismawen ara yettwarun s yisekkilen n wureɣ deg taɣult n ccna, ama d imyura, d imedyazen deg taɣult n tira, s yigerrujen d yidlisen deg uḥric n tsekla, tussna, tasnilest…atg, neɣ d udmawen yemxalafen, ama deg waddal, taklut d ssinima. Yal mi ara d-yeḥḍer lawan, ad ten-id-ttmektayen wid mazal. Abdellah Haman d yiwen seg wudmawen-a. Ur yewwiḍ ara aseggas segmi i aɣ-yeǧǧa, maca ddeqs n yismektiyen d tejmilin i as-yuɣalen, ma drus ar tura 4 n tikwal. Imi d yiwen i d-ineǧren abrid n timmuzɣa deg umalu n tmurt deg yiseggasen-nni n lḥers war tugdi, yefka akud-is i tira d usnulfu ɣef yidles amaziɣ, inuda, yeslul-d tiddukkliwin ɣer tama n yimidawen-nniḍen deg waɣir n Wehran.

Dɣa deg wussan-a, yeffeɣ-d yiwen n wulɣu s yiwet n tikti ara igerrzen ma yessaweḍ yemmed usenfar akken ilaq. Aṣenfar-a, d aheggi n yiwen n udlis ɣef Dda Ɛebḍella.Fkan-d yimsuddsen n leqdic-a akud i wid yebɣan ad kkin, acku leqdic akken ad igerrez, ɣas ad iɛeṭṭel cwiṭ, maca ɣer taggara, ad yaweḍ ɣer yiswi d lmerɣub n wid t-id-iheggan, d wid daɣen ara t-yeɣren. Tikti, yefka-tt-id uselmad amussnaw d umnadi Kamal Nayt Zerrad yesselmaden deg wammas n INALCO deg tmurt n Fransa, akked Ǧamal Benɛuf, amyaru, ameɣnas aqdim n tmaziɣt deg Wehran, ur nesris ara asafu n timmuzɣa ɣas akka yuḍen taggara-ya. Deg sin, llan d imeddukkal i iqerben ɣer Haman Abdellah.

Nnan-d ɣef leqdic

D agzul ɣef wamek ara yili udlis d yiswi-ines, d yilugan i d-yewwi ad ten-ḍefren wid izemren ad kkin. A-t-aya yizen i d-yessers Kamal Uzerrad deg yiwen n ufaylu n internet “Kra n wagguren zrin yakan ɣef tmettant n Dda Ɛebḍella Ḥaman. Imeddukal-is, wid i t-yessnen d wid yuran fell-as neɣ ɣef wayen d-yeǧǧa i tsekla tamaziɣt, bɣan ad as-gen asimɣur (tajmilt) i wakken ad yeqqim deg wulawen, i wakken ad t-issinen ugar wid yeslan yis-s, i wakken ad sseknen i wid ur t-nessin ara kra ɣef tmeddurt-is. Asimɣur-a, ad yili d adlis anda imagraden zemren ad ilin d taggwa ɣef urgaz i yella, ɣef wayen yessuli di tudert-is … neɣ d tazrawt (taseklant, tamesnalest, tasnilsant, atg.) ɣef yidlisen-ines. Talɣa umagrad d tilellit: D asefru neɣ d tariwant neɣ d unuɣ neɣ ayen-nniḍen…

A-ten-id kra n yiwellihen i tira n umagrad ma tebɣam ad ttekkim deg usimɣur : Isekkilen n tira, yessefk ad ilin ḍefren Unikud. Tanekta n yisekkilen ad tili 11. Ur yettaṭṭaf ara ugar n semmus (5) n yisebtar A4 (ddaw n 15 000 isekkilen). Yessefk ad aɣ-d-yaweḍ umagrad sdat 30 cutember 2019 ɣer tansa : asimɣ[email protected]. Nessaram ad d-yeffeɣ udlis taggara n useggas-a neɣ tazwara n win i d-iteddun. Ɣef yiswi n leqdic yecban wagi, nesteqsa Ǧamal Benɛuf, yenna-d “Asenfar-a n umsad n udlis d usiẓreg-ines, ad yili d tajmilt d wakkaz (asṭeɛref) i Dda Ɛebḍella Ḥaman d umennuɣ-ines i lmend n tmaziɣt. Ad yili daɣen d asulef i yimeddukkal-ines d wid akk i t-yessnen akken ad t-id-mmektin, u ad d-mlen iḥulfan-nsen s tira. Zemren yimdanen, ad d-arun tinigiwin-nsen ɣef Dda Ɛebḍella amdan, ameɣnas, amettnaɣ di tegrawla… Zemren daɣen, ad d-fken timuɣliwin neɣ tidmiwin-nsen ɣef Dda Ɛebḍella amedyaz, amaru, amsuqel, neɣ ad gen azɣan i wayen yura”.

Khaled Achoui

- PUBLICITÉ -