Accueil Tamazight Aheggi n yiwen wass n uḥader ɣef waṭṭan n ssker

Wehran : Aheggi n yiwen wass n uḥader ɣef waṭṭan n ssker

338
- PUBLICITÉ -

Ɣas akken aṭas n lḥemlat n useḥses d useɛlem i ttgent trebbaɛ tisnujyatin i usenɣes seg waṭṭan n ssker, maca amḍan n yimuḍan la yettnerni simmal deg merra iḥricen n leɛmer. Gar-asen aḥric n wid meẓẓiyen, imi ijerred umeẓlu (service) n uḥader deg Tenmehla n tdawsa n twilayt n Wehran 968 n liḥalat n waṭṭan-agi, asemmud-nsen ad yili gar 6 ar 16 n yiseggasen. Ɣef wakken i d-iwekked uselway n Umeẓlu Mass Buxari, yenna-d jerden deg twilayt n Wehran s wudem amatu 240 n yigiman n yimuḍan n ssker. ‘’Yezmer ad yali umḍan-a, acku ixuṣṣ uḥader d rrwaḥ s tuddsa ɣer umejjay akken ad yetbeɛ addad n wigi yuḍnen’’, i ikemmel deg wawal-is.

- PUBLICITÉ -

Annect-a, yusa-d imi tettheggi Tenmehla n tdawsa n twilayt n Wehran tigin n wass n useɛlem d tezrawt ɣef waṭṭan n ssker i lmend n Wass agraɣlan n uḥareb n lehlak-a, ass i d-yettezzin deg 14 unbir n yal aseggas. Yerna yefka-d Mass Buxari kra n yiwellihen i yimuḍan, u yenna ilaq ad ḍeffren iwellihen n umejjay, acku d aṭṭan asusam, maca igellu-d s umihi i tdawsa n umdan, am rrwaḥ n yiẓri (asekkud), agezzum n walbaɛḍ n yiḥricen n tfekka, taɣart n yiẓuran n wul d tgeẓẓal, d kra n lehlakat-nniḍen iweɛren. Deg yiwen n leqdic i tga tddukkla tadawsant n Sidi Lhewwari ɣef lehlak n ssker deg umraḥ n tzeqqa n Médiateque i lfayda n yimdanen ass-nni n ahad yezrin. Deg-s daɣen d aheggi i wass n 14 unbir i d-iteddun.

Fkan-d sin n yimejjayen timental i d-ixeddmen aṭṭan-a, dɣa akken i t-id-nnan mi ten-nesteqsa, « Ittekk-d seg tuzurt izaden di lmizan, tidersi n tikli d leqdic, talluyt neɣ timerniwt n tiziregt (la tension) d tuččit ur newzin ara ideg yuget usafar n ukulistirul ». Rnan mudden-d sin-a n yimejjayen awellih i yimuḍan, imi ilaq ad gen addal, aḍfar-nsen sɣur imejjayen i ten-yettdawin akked tuččit ilan isufar idawsanen, asebɛed n yir ixemmimen d uqelleq; akken qqaren “Leḥder yezwar adawi”. Fkan-d diɣen tulɣut i d-yeqqaren belli aṭṭan n ssker d win i d-yettekken seg lwarata.

Khaled Achoui

- PUBLICITÉ -