Accueil Tamazight Ahil d amerkanti i tejmilt n Kaysa

Ayt Smaɛel : Ahil d amerkanti i tejmilt n Kaysa

129
- PUBLICITÉ -

I lmend n teẓrigt tis 17 n tfaska n tmedyazt tamaziɣt, ara yilin d tajmilt i tmarut Kaysa Xalifi, thagga-d tddukkla tadelsant Adrar n Fad ahil s wazal-is, ara idumen teɣzi n kraḍ n wussan n ttiɛad-a adelsan ansayan. S uberriḥ n « Skud tezdi-aɣ tikti, ilaq gar-aneɣ ad tefti », ad maggen ddeqs n warmuden deg Uxxam n yilemẓiyen Mulud At Mɛemmer n Ayt Smaɛel, seg wass n amhad 28 armi d sed 30 meɣres. Dɣa, yetturaǧu seld asnubget d tullya tunsibt, ad mmɣen yakk yimeḥḍar deg wahil n tejmilt d usemres n warmuden yemgaraden i d-yettwaheggan. Ugar n yiḥuna (ateliers) ara zdin yimedyazen abeɛda, ṭṭabla timezdit ara d-yettwassuddsen, yella daɣen deg wahil wass n tezrawt ara d-gen yiselmaden n tmaziɣt n tesdawiyin n Bgayet d Tizi, d wid iḍallen akken ilaq ɣef tira n Kaysa. Ula d isaragen yetturaǧu ad d-ttwasneɛten ugar n sin i icudden s umata ɣer tsekla d tutlayt. Iban, ad d-ternu ɣef waya, seg tikkelt ɣer tayeḍ, tmenna n yisefra d tin n tullisin sɣur yimedyazen d yimura imekkiyen deg yimsizwar n usefru d tullist. I telɣut, ayen yerzan amsizwer n tmedyazt iɣer i d-tessawal tddukkla, ad ilin di meɣres-a azal n 80 n yimedyazen ara iɛerḍen ad d-sbeggnen amaynut i d-wwin. Ula deg umsizwer-nniḍen n tullist ifazzen, deg teẓrigt tis snat, yetturaǧu ad ttunefken warrazen i wid yufraren. Ad d-nesmekti d akken ad d-yennulfu deg tfaska n meɣres-a warraz Kaysa Xalifi n usideg, am wakken ara yawi sya d tasawent warraz n usefru n tmeṭṭut isem n tmerḥumt Kaysa Xalifi. Arraz-a, ad yettunefkay yal aseggas s tallelt n teẓrigin Ccix Muḥend Ulḥusin. « Nebɣa ad tili s wazal-is tejmilt-a ara nerr i tmarut-nneɣ Kaysa Xalifi, ama sɣur yiɛeggalen neɣ sɣur yimekkiyen d yinebgawen », d awal n yiwen n uɛeggal n tddukkla tadelsant Adrar n Fad.

- PUBLICITÉ -

M. K.

- PUBLICITÉ -