Yekker zzhir deg usuddes n leqdicat idelsanen sɣur umussu addukklan n lwilaya n Tubiret. Dɣa, i lmend n usmekti n umulli wis 39 n tefsut n yimaziɣen (20 yebrir 1980) akked umulli wis 18 n tefsut taberkant (20 yebrir 2001), yettwahegga-d wahil d anesbaɣur ɣef teɣzi n ddurt deg taɣiwant n At Leqsar i yetabaɛen ɣer lwilaya n Tubiret.
Ad yebdu usiher-agi seg 23 yebrir 2019, deg tzeqqa n ODEJ n Tubiret, yetturaǧu ad yekfu wahil-agi ass n 27 yebrir 2019. Ad d-ilin deg-s sin-agi n yirmad igejdanen: Rreḥba n udlis, deg tezrigt-is tamezwarut akked tfaska taɣelnawt n tmedyazt tamaziɣt, deg tezrigt-is tis ukkuẓet.
Tafaska taɣelnawt n tmedyazt tamaziɣt
D ttiɛad i ttraǧun ddeqes n yimedyazen d tmedyazin wat yiles amaziɣ, yetturaǧu ad ttekkin ddeqs n yiḥeddaden n wawal d wid yettewzanen awal deg usefru, deg tazrigt-agi tis ukkuẓet n tfaska taɣelnawt n tmedyazt tamaziɣt, ara d-yilin aseggas-agi seg n lexmis 25 alamma d ass n ssebt 27 yebrir 2019, deg tzeqqa n ODEJ n lwilaya n Tubiret.
Imedyazen d tmedyazin i yebɣan ad ttekkin deg temsizzelt-agi, ilaq fell-asen ad aznen yiwen n usefru, yettwarun s tlatinit s ttawil n uselkim. Am wakken daɣen ilaq ɣef yal yiwen neɣ yiwet, ad iceggeɛ daɣen tukkist n warrat n tlalit d yissalen yerzan tudert-nsen (isem, aɣara, tansa, uṭṭun n usiwel).
Ad yili uceggeɛ n yisefra ɣer tansa-agi taliktrunit: [email protected] Ma i wugar n yisallen, siwlet ɣer wuṭṭunen-agi: 0779.05.77.85 neɣ 0770.43.87.95. Imedyazen ara yettekkin deg tezrigt-agi tamaynut, yetturaǧu ad rzun seg waṭas n lwilayat n tmur n Lezzayer timazɣawalin, yecban: Tizi Uzzu, Bgayet, Tipaza, Bumerdas, Tubiret, Xnecla…atg.
Tazrigt tis snat n rreḥba n udlis
Am wakken daɣen i yetturaǧu, ad tili tezrigt tis snat n rreḥba n udlis n Leqsar, ara d-yilin ɣef teɣzi n ddurt. Ad tebdu ass n ttlata 23 yebrir 2019, ad tekfu ass n ssebt 27 deg waggur n yebrir i d-iteddun. D ttiɛad adelsan ameqqren, ideg yetturaǧun ad kkin waṭas n yimura imaziɣen, ara yessenzen idlisen-nsen s ubuddu.
Ad ilin yimedyazen ara d-yawin ammuden-nsen n tmedyazt d yineggalen ara d-yeglun s wungalen-nsen. Am wakken daɣen ara d-ilin yimura n tewsatin-nniḍen deg ttiɛad.Yetturaǧu diɣ ad d-ilint temsikniyin n yidlisen neɣ timsikniyin n usenzi sɣur ddeqs n tizrigin, ara d-yerzun si yal tama tamaziɣt.
Am wakken daɣen i yetturaǧu ad yili wahil n yisaragen ɣef yisental yemgaraden. Ɣer taggara, ad d-nesmekti, belli leqdicat-agi idelsanen, ad ilin tikkelt-agi d tajmilt i 7 imeɣrasen n tmaziɣt, yecban; Mulud Mɛemmri, Matub Lwennas, Muḥend Arab Bessaɛud, Sliman Ɛazem…atg. Ma d tiddukkliwin tidelsanin i d-iheggan leqdic-agi, ad naf Tiddukkla tadelsant Amaziɣ, s tallelt n tiddukkliwin-agi: Tafat, Talwit, Tadukli akked tiddukkla Leḥsan.
Ghani Amazigh