Sendiḍelli n ssebt n 23 meɣres 2019, i yebda leqdic adelsan i d-yettwaheggan, i lmend n yimuras n tefsut iɣurbizen, ama deg Uxxam n yidles Mulud At Mεemmer n Tizi Uzzu, ama deg tneḍfart-is n Azazga.
D ttiεad adelsan, i d-yettilin i lfayda n warrac imeẓyanen, ad yeddu alamma d 05 yebrir i d-iteddun. D tagnit ideg ara faṛsen yilmeẓyen imuras-nsen n tefsut, yerna ad sgunfun cwiṭ seg ulmud, mebɛed sin n yikerḍyuren n leqraya. Ttilint-d temsikniyin-agi ɣef teɣzi n tɛecret tadelsant n yimuras, ama deg uxxam n yidles Mulud Mɛemmri n Tizi Uzzu neɣ deg tneḍfart-is n Azazga, yal ass seg 09h00 alamma d 16h00 n tmeddit. Dɣa, gar temsikniyin-agi, tella tinna n yidlisen n yigerdan akked umezruy n tmurt n Lezzayer, seg 1830 alamma d 1962. Am wakken i d-ttilint temsikniyin-nniḍen n yimuhal n yigerdan. Yettili-d daɣen usenzi s ubuddu n yidlisen yal ass.
Ahil n Uxxam n yidles n Tizi Uzzu
Sendiḍelli n ssebt 23 meɣres, yella-d usikew n usuneɣ ɣef 10h00, syin akkin yella-d usiher n ccna d yimseḍsi sɣur tiddukkla tadelsant n Yibetrunen. Ma d iḍelli n lḥed, yella-d usikew n tulsa n tmucuha ssbeḥ, ma deg tmeddit, yella-d usarag ɣef wazal n yigerdan deg unegmu n tmetti. Ass-agi n letnayen, ad tili tsebṣhit-agi tirza ɣer Usalay n umjahed n Tizi Uzzu, ma ɣef 14h00, ad yili usiher n tddukkla tadelsant Iraten. Azekka n ttlata 26/03/2019, deg umḍiq n yisikwan, ad d-yili yiwen n usikew ɣef useḥbiber ɣef tikli deg yiberdan.
Syin ɣur-s ɣef 14h00 deg tzeqqa tameẓyant n umezgun, ad d-yili usiher n yimseḍsi Fufu d Pinuca. Ma i seldazekka n larebɛa 27/03/2019, seg 10h alamma d 16h00 n tmeddit deg umḍiq n yisikwan, ad yili usikew n warraren isesnegmayen, ma deg tzeqqa tameẓyant, ad yili usiher n yimseḍṣi “Kimous d Kouki” sɣur Youcef akked Ibrahim. Ass n lexmis i d-iteddun, deg tsebḥit n wass, ad yili usikew n yimuhal n ufus. Ma seg 14h alamma d 16h00 deg tzeqqa tameqqrant, ad tili turart n tmezgunt “Agrud bu tɣennant” sɣur Axxam n umezgun Kateb Yasin. Ma i taggara n ddurt-agi, yetturaǧu, ad d-yili usikew n rrqem ass n lǧemɛa, ma d azekka-in n ssebt, ad yili usikew n teklut di tsebḥit n wass. Ma deg tmeddit, ad yili leqdic n tddukkla “SOS” n yigerdan, ad yili diɣ usiher n useḥḥar Hacmi Ɛmer. Yetturaǧu ad ikemmel wahil-agi ɣef teɣzi n ddurt i d-iteddun, imi ɣef wakken i d-nenna ad yessali ass n lexmis 05 yebrir i d-iteddun.
Ahil n Wammas adelsan Krim Belqasem n Yiɛeẓẓugen
Ass-agi n letnayen, 25 meɣres 2019, i yebda wahil-agi n yimuras n tefsut deg Wammas adelsan Krim Belqasen n Yiɛeẓẓugen. Dɣa, ssbeḥ-agi ɣef 10h00, ad yili usikew n usuneɣ, ma ɣef 14h00 ad yili usiher n useḥḥar Ben Ḥemmu. Azekka n ttlata, ad yili ssbeḥ usikew n tussnaggurt ma di tmeddit n wass, ad yili usenɛet n yiwen usaru n temkaḍuft (animation). Ass n larebɛa i d-iteddun, ad ilin yigerdan di ttiɛad akked yisikwan n tddukkla “Les Petits Débrouillards”, tin ɣur-s ɣef 14h00 d ashier n yimseḍsi Farḥa wa Zahwa. Ula d ass n lexmis, 28 meɣres 2019, ad yili usikew n usnulfu ilelli akked usenɛet n yiwen n usaru n temkaḍuft. Ma d ass n ssebt i d-ileḥḥun, ad yili usikew n ssinima i warrac imeẓeyanen, am wakken daɣen ara d-tili turart n yiwet n tmezgunt, sɣur tiddukkla n Yibetrunen. Yetturaǧu daɣen ad ikemmel wahil-agi ɣef teɣzi n wussan-agi i d-iteddun, s yisikwan, turart n tmezgunin, timeɣriwin n ccna…atg.
Ghani Amazigh