Accueil Tamazight Album aslag n Sifaks Yal

Album aslag n Sifaks Yal

129
- PUBLICITÉ -

Isuffeɣ-d ussan-a kan n wayyur-a n yebrir ucennay ilemẓi Sifaks Yal sin n yiḍebsiyen n ccna ɣef tikkelt. Ad naf deg sin n walbumen-a, i d-yeffɣen ɣer teẓrigin « New Harmonie Production » , azal n 12 n tezlatin, yiwen s uzwel n « Tasertit n tmurt », wayeḍ « Amezruy n tayri-w ». Ayen yerzan asnulfu, d netta i d ameskar n yisefra, i d acennay n tezlatin i ṭṭafaren tikwal wallalen n uẓawan, tikwal d turarin n usanti, deg tezlatin ideg yezreb wanya abeɛda.

- PUBLICITÉ -

Ma yella seg tama n yisental i yecna Sifaks aseggas-a n 2019, nezmer ad d-nini ruḥen seg tlufa n tmurt, timetti d wansayen, armi d tayri d wayen iceɣben ilemẓiyen s umata. Imi dɣa, ma nebder-d izwal n tezlatin, ad naf deg walbum amezwaru « Tasertit n tmurt », « Nedment tregwa », « Aḥebbud aḥebbu », « Akli n tuzzuft », « Zzyara ɣer lemqam » akked « Ansayen n teslit ». Ma deg wis sin, dima s sḍis n tezlatin, ddan-d deg-s « Asmenɣer n tiṭ », « Amezruy n tayri-w », « Asirem ɣef lɣerba », « Iḥulfan d tmeddurt », « D axeddam s umelyun » akked uneggaru « Aheyyi n lejhaz ».

Yeɛreḍ ucennay ad iḥaz ineḍruyen imiranen, am s tezlit « Tasertit n tmurt », ideg i d-iger awellih ɣef wayen itezzin taggara-a di tmurt, akken i d-yeqqar uzwel dɣa. Daɣen, tesɛa tayri amḍiq deg wayen yecna s yisem-is d ilemẓi, am deg tezlit « Amezruy n tayri-w ». Isem-is n tidet Sifaks Ɛisi. Ilul deg taddart n Ayt Buɛisi, taɣiwant n Tizi n Berber. Akka tura, aql-it d anelmad deg ugezdu n tutlayt d yidles amaziɣ, aswir n Master.

M. K.

- PUBLICITÉ -