Accueil Tamazight Amḍan n uttekki n yinaẓuren yugar akk tizrigin iɛeddan

SAḤEL - Tafaska tadelsant Raconte-Arts

Amḍan n uttekki n yinaẓuren yugar akk tizrigin iɛeddan

40

D taddart n Saḥel, di tɣiwant n Buzgan (70 n yikilumitren ɣef temdint n Tizi Uzzu), ara yesdarin tazrigt tis mraw d seddiset (16) n tfaska tadelsant «Ales-iyi-d taẓuri neɣ Raconte-Arts».

Mbeɛd, mi mḥezwaret snat n tuddar-a Saḥel di Buzgan akked Lqelɛa n At Ɛebbas deg Yiɣil Ɛli di Bgayet, tettwafren taddart n Saḥel. Afran n teseqqamut n uktazal, yextar taddart-a n Saḥel ɣef temɣer-ines akked usuddes-ines i waṭas n leqdicat idelsanen gar-asen, tameɣra n ukermus. Yetturaǧu ad tili tezrigt-agi tamaynut, gar 19 ar 26 yulyu i d-iteddun deg taddart n Saḥel di Buzgan. Am wakken daɣen, yetturaǧu ad d-yili uttekki n waṭas n yinaẓuren, ara yilin yugaren akk tizrigin iɛeddan. Ɣef wakken i t-id-yenna Mass Metref Ḥsen, aselway n tesmilt n usuddes: “Niqal ad d-nessuffeɣ amḍan aneggaru n yimekkiyen deg tezrigt-agi, imi ass-nni ideg tekfa tallit n ujerred (20 yunyu), umuɣ n yisenfaren i d aɣ-d-ikecmen yugar ayen nurǧaˮ.

Yerna yenna-d belli : “Lwilayat akk n tmurt, ad ilint s waṭas, rnu ɣer ugar n 150 n yimttekkiyen ara d-yasen seg tmura tiberraniyinˮ. Ɣer taggara, ad d-nesmekti belli tafaska-agi, llant deg-s aṭas n tewsatin n tẓuri d yidles, gar ccna, aẓawan, amezgun, tasekla, isaragen, isura…atg. Tazrigt tamenzut, tella deg 2004 deg At Yanni, ma d taneggarut, tella-d ilindi deg taddart n Tiferdud deg At Yusef.
Gh. A.