Accueil Tamazight Aman ala

Cwiṭ seg tmucuha n leqbayel : Aman ala

79
- PUBLICITÉ -

Macahu tellem cahu, Rebbi ad tt-iselhu, a tt-iɣzif annect n usaru. Yella yiwen umerkanti d ameqqran, yesεa lxir, maca d aεessas kan fell-as, acku yederɣel wul-is ɣef yimeɣban. Ihi, yebɣa ad iɣez lbir di tmurt-is. Yewwi-d ixeddamen mechuren di tɣuzi n lebyur. Mi la ttemsewwaqen ɣef ssuma, faqqen-as ixeddamen belli d argaz amellaẓu, seg wid iḥemmlen ad yečč tidi n wiyaḍ. Asmi iwala mačči d wid-n ara as-ixedmen baṭel, yenna-asen: “Teẓram, ssuma-agi ara teṭṭalabem, ad awen-tt-ffkeɣ, maca ur awen-d-ttawiɣ imekli wala imensi, wala lqahwa. Ula d aman ala, tfehmem neɣ ala ?

- PUBLICITÉ -

Nnan-as ixeddamen : “Nekni, neḍleb azref n tidi-nneɣ, kečč tebɣiḍ ad tawiḍ Llah ibarek, tugiḍ, Llah isahel.

-Nniɣ-d aman ala.

Bdan ixeddamen, qqazen rennun maca ugin ad d-banen waman.

Nnan-as: “Muqqel ay ameddakkel, ayen i ɣef nemsefham nɣez-it, a-t-an ur d-banen waman”. Iwala urgaz, yexser idrimen, ixemmem yenna-asen: “Kemmlet ɣzet”. Tkemmilen qqazen armi d anda ur zmiren ara nnan-as: “Ay argaz llεali, ulac ulac. Aql-aɣ nɣez, nεedda tilas n lebyur”. Iddem urgaz, ixelles ayen ur iɣellet, yenṭeq: “D lewhayem! Dagi ufan akk deg-s medden aman ala nekk! Yenṭeq yiwen uxeddam: “Yak d kečč i d-yezwaren awal, mi d-tenniḍ aman ala! Amek tebɣiḍ, ad d-tafeḍ”.

Yahia Yanes

- PUBLICITÉ -