Accueil Tamazight Aman d ugur n yikerrazen

Kefrida

Aman d ugur n yikerrazen

32

Tettwassen taddart n Kefrida, i d-yezgan deg tɣiwant n Tsexriwt, Anẓul-asamar n Bgayet, s ccyaḍa n wakal yelhan i wuẓi d tzegzewt-is i tt-yettcebbiḥen ula deg unebdu. Deg wayen yezrin, nezmer ad d-nini ur ufin ara aṭas n yiɣilifen at tbeḥyar d yimerjaɛ akken ad sswen tasna-nni anda ẓẓan. Kra sswayen seg taliwin n da d din, wiyaḍ seg wanuyen i bnan, kra-nniḍen srid seg tberninin n uxxam.

D acu kan, yegla-d lǧehd n unebdu, aseggas-a, s ddeqs n lexsas n teɣbalut-a n tudert, armi llan kra n yimdanen qrib qquren-asen wurtan-nsen war ma zemren ad d-gen kra. Ahat iḥuza unezgum ageɛmer wid izedɣen berra i temnaḍt-a n Kefrida ugar n yimezdaɣ idiganen. Ladɣa ma neẓra d akken tura ula d wid i yesɛan ixxamen iqburen din, skecmen ɣer tnezduɣin ijeɛbuben i tbernint akken kan ad sswayen tibeḥyar-nsen. Seg yibeɛɛaden i yenṭerren aṭas seg waddad-a n tuqin n waman, llant kra n twaculin n tɣiwant n Ayt Smaɛel i yesɛan tiferkiwin di Kefrida. Llant kra iḥettem-itent lḥal i wakken ur xeddment ara tibeḥyar aseggas-a ɣef ssebba n waman, ulamma nnument ttawint-d syin buhan n yisufar n wučči, abeɛda tidelt (lxeḍra).

«Ur d-nemmugger ara ilindi aɣilif n waman am win i d-nemlal aseggas-a. Deg-s xussen waman n taliwin, deg-s ur ǧhiden aṭas wid n tbernint segmi xedmen kra n yimdanen tiberninin i yixammen ideg ur zdiɣen», i d-yenna bab n yiwen n yireẓẓi (taferka). Ad d-nesmekti d akken ɣef wugur-a n wid yeqqnen ɣer uẓeṭṭa n ubḍaw n waman deg yixxamen yettwaǧǧen, llan yiɣermanen i yebɣan ad ccektin i yimḍebbren n tɣiwant n Tsexriwt akken ad walin di taluft-a. Ɣef wakken i d-nnan, meskud muggent tberninin i tbeḥyar kan, ula d nutni sɛan azref ad asen-temmag tbernint i wurti-nsen.
M. K.