Deg yiwen n wulɣu i d-tessufeɣ ussan-a tkebbanit TQ5 Media, ddan-d kra n yisallen ɣef umaynut i d-yellan ussan-a sɣur-s. Yerza waya abeɛda akcam deg umaḍal umḍin d tetiknulujiyin timaynutin.
«I wakken ad telḥu deg ubrid n usnulfu, d uwenneɛ n ssrabes-is i lfayda n yimsaγen, ladγa ilemẓiyen i icudden γer umaḍal umḍin, s tumert ara d-tberreḥ tkebbanit TQ5 s tlalit n tγerγert tamaynut isem-is TQ5 TV», aya d kra i nezmer ad nɣer deg wulɣu-nni. Ɣef tɣerɣert-a tamaynut, iban-d ad yaf umsaɣ deg-s aṭas n lesnaf n uḍfar d unnezdi (Abonnement). Imi deg-s ad yili ttawil n Live Streaming akked Video On-demand (VOD).
«D tiγerγert isehlen maḍi i usilel, d tin isɛan agbur anḍan s yiwen n unnezdi, s yis-s i tzemrem ad twalim TQ5 s talγiwin n TV, Mag, Android TV, Smartphone, tablette, SmartTV akked Google Play Store (Android). Akka, TQ5 tekcem amaḍal umḍin d tetiknulujiyin timaynutin.
Tineggura-a, ad mlilent d ifarisen idelsanen (tasekla, Sinnima, aẓawan, atg.) ad lḥunt akken deg umaḍal uhlis (virtuel) anda imsudren i yellan deg yal tama n ddunit, ad kecmen deg-s s wudem afessas», i d-yeddan daɣen deg wulɣu. Ma ɣef unnezdi, nnan-d yimḍebbren sefsusin ula d ssuma akken ad fken tagnit i yal Aqbayli di lɣerba ad yesɛu TQ5 di internet. Yella dɣa unnezd i useggas neγ n wayyur, i lmend n lebγi n yimsaγen.
Mi ara yekcem yiwen deg www.tq5tv.com, yezmer ad yennezdi s uttekki deg tqeffalt « ABONNEZ-VOUS » i yellan s ufella γer uyeffus n usebter n unekcum n wadeg-a, syin ad d-yesnulfu amiḍan swayes yezmer ad ibeddel kra di yal akud, deg usebter n umiḍan n unnezdi.
Ad d-nesmekti dakken amaynut yerza kan Iqbayliyen i yettidiren di lɣerba. Wid n Tmurt, seld mi teḥbes. TQ5 deg ugensa, nnan-d yimḍebbren ur ttɛeṭṭilen ara ad d-uɣalen deg ugensa-nniḍen d amaynut. I usteqsi, neɣ i wugar n yisallen, arut ɣer tansa-a: [email protected].
M. K.