Accueil Tamazight Amek-itt liḥala n udlis aqbayli?

Asizreg

Amek-itt liḥala n udlis aqbayli?

81

Iseggasen-a ineggura tennerna amacemma tsekla taqbaylit. Tamkarḍit i tuɣ zik d tilemt, ass-a simmal teččaray s wayen i d-snulfuyen yilemẓiyen d tlemẓiyen. Yuɣ abrid ɣezzifen usenfar n uɛeddi ɣer tira. Tura akka mi yewweḍ tizi n usekfel d uḥraz, ad d-yeqqim uwenneɛ d usegreɣlen n tsekla taqbaylit. D acu, gar wayen yellan d tigejda iɣef ibedd usiweḍ, d assaɣ i yettmeẓḍan gar udlis d umdan. Yadra yefka azal uqbayli i wayen i d-yennulfan di tsekla? Neɣ amek tga liḥala n udlis aqbayli di tnedlisin, imi d nutenti i d tamaqqant gar udlis d yimeɣri.

Neɛreḍ ad nesteqsi wid yellan deg tezrart n udlis akken ad d-nerr i yisteqsiyen-a. Ɣur yiwen n umaẓrag n Bgayet, «ruḥen d iḥricen wid yefkan azal i udlis aqbayli, am wakken iruḥ d talliyin usenzi n udlis aqbayli. Amedya, yella umgarad mi ara yili d anekcum aɣurbiz, neɣ d taggara n useggas i yimuras ». Yiwen n yimḍebber n tnedlist di Bgayet, iban-aɣ-d ur t-tessefreḥ ara taluft. «Cwiya kan. Ur iteddu ara mliḥ udlis amaziɣ», i d-yenna. Nessesten amaẓrag-nniḍen, di Tizi Uzzu, i yellan d amsuzzer daɣen, yenna-d: « adlis aqbayli, am yidlisen n tefransist d teɛrabt, ur ileḥḥu ara aṭas abeɛda taggara-a.

Mačči ɣef tnekkra-a i la iḍerrun, wanag ɣef wugur n tdamsa i tettidir tmurt». Mi t-nesteqsa ɣef yisdawanen ma yella ttaɣen idlisen n teqbaylit neɣ uhu, yerra-d: «Tuget ttaɣen ma yella sran-asen i tezrawin neɣ i ukatay. Lḥasul, mačči d isdawanen i d imsidren igejdanen n udlis aqbayli». Dima di Tizi Uzzu, yenna-aɣ-d yiwen n yimḍebber n teẓrigin d timaynutin: «Akken ttwaliɣ, yettnerni udlis aqbayli, yettnulfu-d deg-s umaynut, am wungalen, idlisen n tussna. Maca, ɣas llant teẓrigin, llan yimura, ulac imeɣriyen aṭas». Ma yella si tama n yimeɣriyen i yeɣɣaren kra deg useggas, ttwalin yelha usṭuqqet n lesnaf n yidlisen i yimduren (leɛmur) merra, maca daɣen ilaq ad d-tufrar tɣara d tamezwarut.

M. K.