Ttidiren yimezdaɣ n tnezduɣin tiqdimin i yellan deg uzniq Stalingrade, deg yiɣrem akk aqbur n Wehran Sidi Lhewwari, deg yiwen umihi meqqren s tugdi n uɣelluy n tnezduɣin-a ɣef yiqerray-nsen di yal tallit, ma nwala icerrigen d yiceqqiqen ɣef yiɣraben d yibalkuten iwumi ur d-yeqqim wacemma, rnu iɣerdayen i yeččuren amkan si daxel neɣ si berra. Tinezduɣin-a, ttuɣalent ɣer tallit n Yirumyen asmi llan dagi u ttwaṣenfent gar yidgan imazrayen iqburen.
Limer terbiḥeḍ ay ul tili ad qqiment akken beddent. Maca, d ttɛebga n lesnin d lqella n ureqqeɛ n wayen i yellan d aqdim i yerran tudert n waṭas n twaculin deg umihi. Ɣef waya i d-yewwi ad d-gren iman-nsen wid teɛna temsalt seg tɣiwant n Wehran d yimasayen-nniḍen akken ur tḍerru ara yid-sen twaɣit-nni yeḍran deg «La Casbah», deg tmanaɣt ussan iɛeddan, anda llan ula d wid yemmuten. Mi nqerreb ɣer din, nufa ladɣa imezdaɣ n lbaṭima uṭṭun 14 i yenṭerren s waṭas u ttrajun s tɣawla akken ad yili usuffeɣ-nsen, ad asen-beddlen tanezduɣt. Cwiṭ kan i mazal deg tseddarin d ssqufat akken ad d-ɣlin, ula d aṣeggem ad yiwɛir acku d lbenyan aqdim nezzeh.
Deg kra n tamiwin, yella wanda i d-yettban wuzzal n lebni, yettwarba s plastik akken ad iḥer aman n lehwa ur d-keččmen ara ɣer yixxamen ladɣa deg tsemhuyt n tegrest anda ttidiren s tugdi meqqren akken ur d-ɣellint ara fell-asen, ladɣa mi ara d-ihub waḍu. Imi nemmeslay d kra n yimezdaɣ, wekkden-d lɣiḍ-nsen seg yimasayen idiganen d umaris n uselḥu n lbenyan, yugin ad d-slen i yisuturen-nsen acḥal-aya s ubeddel n yidgan n tnezduɣin, ma neẓra d akken imdanen-a seg wid ur nezmir ara ad aɣen ixxamen s ttawil-nsen, ɛlaḥsab n umeslay-nsen. Rnu ɣer waya, ttxelliṣen lekra ɣer ssrabes n umaris n uselḥu n lbenyan.
Khaled Achoui