Accueil Tamazight Amkan n udlis n tmaziɣt di tmetti-ines

Tasekla ass-a

Amkan n udlis n tmaziɣt di tmetti-ines

148

Tira s tmaziɣt neɣ ɣas ini s teqbaylit, ( tuget n yifarisen i d-yetteffɣen s tutlayt n tmaziɣt, s teqbaylit i ttwarun ), temhaz deg yiseggasen-a ineggura. Simmal zerrin wayyuren d yiseggasen, simmal tteffɣen-d yidlisen n tmaziɣt, ttlalen-d ugar n yifarisen. D ungalen i yeṭṭfen adeg amezwaru, tullisin, idlisen n tmucuha, kra n yimawalen. Ayen yessefraḥen daɣen, d ilmeẓyen i d-yettnekkaren, i as-yegren irebbi i tira, d wid yeɣran tutlayt n tmaziɣt di tesdawit, sselmaden-tt deg yiɣerbazen. Ilmeẓyen, ur tt-neɣri ara, maca sɛan afud, lemden-tt i yiman-nsen, armi uɣalen gar yimura ifazen n tutlayt tayemmat-nsen. Ayen yerzan idlisen n tussna neɣ tujjya d wayen icudden ɣur-sen, ɣas drus-iten, maca llan yimeskaren i asen-yegren iɣallen, ssuffuɣen-d kra swayes zemren deg taɣulin-a.

Drus maḍi i yeqqaren idlisen

Maca mi ara nruḥ ad neg leḥsab, neɣ ad nesteqsi ma ttnuzun yidlisen-a  akked  umḍan n widen i ten-yeqqaren, ur aɣ-d-yettmagar ara yisalli yelhan. Acku ama d imawlan n teẓrigin, ama d imeskaren n yidlisen, zgan dima d acetki, qqaren ur ileḥḥu ara udlis n tmaziɣt, ur yettnuzu ara s waṭas. Uguren yezmer lḥal, mačči d yiwen. Acku, am wakken yella deg yinzi-nni «wa meɛḍur wa d lḥeq-is». Bab n teẓrigin, d azref-is, ad yini ur ileḥḥu ara udlis n tmaziɣt, ma d tidet ur t-ttaɣen ara leqbayel. Ameskar, yesɛa azref ma yenna-d aṭas n teẓrigin ur nettaṭṭaf ara adlis neɣ ttaddamen kan kra. Ma nmuqel daɣen ɣer tudert yesseṛwan lḥif i uɣerman, tamurt ur nerfid, ur nessefreḥ arraw-is, aṭas n yimdanen iɣef ɣlay udlis n 400 idinaren, acku awi-d ad kfun lqut n twaculin d tarwa-nsen ! Ciṭuḥ-nni yettaɣen idlisen n tmaziɣt deg temkerḍiyin, d wid terza temsalt, llan deg taɣult, neɣ akken i d-nenna s ufella, d imeɣnasen i iḥemmlen tutlayt-nsen, ɣas ma ttmahilen deg taɣult ibeɛden akk i unnar n tmaziɣt.

Ugur n udlis, yerza akk amaḍal

Ugur n tɣuri, nezmer ad d-nini, ur yerzi ara kan leqbayel neɣ imaziɣen, ayen ur qqaren ara idlisen n tutlayin-nsen. Acku tudert tamirant tessenqes nezzeh idles n tɣuri n udlis. Ula di tmura timeqqranin, timerkantiyin, yettwassnen d timura n tɣuri, yuɣal udlis ɣer tama. Wama ma nebder-d timura taɛrabin, ad nessusem maḍi, imi ur yeṭṭif ara udlis amkan di tudert-nsen, anagar idlisen n ddin d wid n tuččit ahat uɣur mmalen. Tamentilit d tin kan ibanen, s unulfu n walallen-a atraren ifessasen, rran kullec ɣer daxel n uglaway d uselkim. Yuɣal umdan yesmenyif ayen fessusen, icebḥen deg yiselkimen ɣef tewriqin n udlis. Ɣas ma annect-a yettaǧǧa-d lmaḍerra meqqren i tdawsa n umdan.

Khaled Achoui