I lmend n usmekti n umulli wis 39 ɣef tefsut n yimaziɣen i d-yellan ass n 20 yebrir 1980 akked usmekti s tefsut taberkant n 20 yebrir 2001, amussu addukklan n tɣiwant n Ait Aissa Mimoun, yeḥya-d ttiɛad-a.
Dɣa deg taddart n Akaoudj, tella-d tezrigt tamezwarut n temsizwert n tazla, ideg rran tajmilt i umeɣnas n tmaziɣt Bessaoud Mohand Arav, imeḍlen deg taddart-a. D tazla, i d-yellan ass-nni n ssebt, 20 yebrir 2019, deg taddart n Akaoudj. D leqdic i d-yettwaheggan sɣur Tddukkli tanaddalt n Ait Aissa Mimoun s tallelt n tɣiwant-agi akked Useqqamu aɣerfan n lwilaya (APW) n Tizi Uzzu.
D asiher i d-yeḍran deg tegnatin igerrzen, ɣer taggara, yella-d usebɣes n wid i d-yufraren deg tazla-agi. Ula d tiddukkla tadelsant “Imnar n Tdukli” n Ait Aissa Mimoun, tella deg ttiɛad i lmend n usfugel s snat n tefsuyin-agi (1980/2001). Yella-d wannect-a s yiwen wahil meẓẓiyen, i yebdan taṣebḥit n wass-nni n ssebt s usersi n tmeqqunt n yijeǧǧigen ɣef uẓekka n umussnaw d umeɣnas Bessaoud Mohand Arab. Am wakken daɣen i d-tella yiwet n ddqiqa n tsusmi ɣef rruḥ-is d rruḥ n 127 n yilmeẓyen yemmuten deg tefsut taberkant 2001. Syin akkin ikemmel leqdic deg tmeddit n wass, s usiɣi n 127 n tcumɛatin i d-yellan d tajmilt i 127 n yimeɣnasen n tugdut d tmaziɣt.
Timsizzelt n ddabex uḍar d tajmilt i Mouloud Yarkal
Ass-nni n lǧemɛa 19 yebrir 2019, i tebda temsizzelt n temliliyin n ddabex uḍar deg tɣiwant n Ait Aissa Mimoun, i d-yettilin deg unnar aɣiwan yellan deg Tiplakine. D asiher n waddad, i d-yettilin i umarḥum Yarkal Mouloud, i yellan d ufrin (élu) deg Useqqamu aɣerfan aɣiwan n Ait Aissa Mimoun. D ilmeẓi, i d-yefkan ayen iwumi yezmer i tɣiwant-is, ulac win ur d-nettader ara isem-is. D timsizzelt n temliliyin, i d-ihegga ugraw n waddal n Ait Aissa Mimoun, ara yeddun ɣef teɣzi n waṭas n wussan, imi aṭas n temliliyin i yellan. Timlilit n tazwara, tella-d ass-nni n lǧemɛa iɛeddan ɣef 17h30 n tmeddit gar snat n trebbuyaɛ-agi: tarbaɛt n taddart n Tahanouts (taddart n umerḥum-agi) mgal tin n taddart n Ighil Bouchene (taddart n yimsuddsen). Maca uqbel annect-agi, tella-d ddqiqa n tsussmi ɣef rruḥ-is.
D imlilit n tazwara, i yeḥder uselway n tɣiwant n Ait Aissa Mimoun Akli Chabane, i ixedmen yid-s 5 n yiseggasen deg tɣiwant. Am wakken daɣen i ḥedren dinna ddeqs n yiɛeggalen n twacult-is tameẓẓyant akked tmeqqrant. Timliliyin-agi, ttilint-d yal tameddit n wass ɣef 17h30 n tmeddit deg unnar aɣiwan n Ait Aissa Mimoun. 14 n temliliyin ara d-yilin sya ɣer taggara n temsizzelt-agi, i yetturaǧun ad tili ass n lexmis 09 mayyu 2019. Ass n lǧemɛa-agi sdat-nneɣ, yetturaǧu ad tili tfugla ideg ara as-awin tameqqunt n yijeǧǧigen ɣer uẓekka-s. ad tettunefk daɣen tegnit n tnagiyin d waktayen n yimeddukkal-is d twcult-is. Am wakken daɣen i yetturaǧu ad tili diɣ sya ɣer taggra n temsizwert-agi, temlilt gar yimurar iqburen n terbeɛt n JSK d wid n Ait Aissa Mimoun. Ɣer taggara, ad nesmekti belli Mass Yarkal yewweḍ leɛfu Rebbi ass n 1 yebrir n useggas yezrin, yeǧǧa-d deffir-s sin warraw-is d ileqqaqen. Mi ara tessali temsizzelt-agi n temliliyin, ad yettwafraq wayen i d-yettwajemɛen ɣef twacult-is tameẓyant.
A. Gh.