Deg wulɣu n tɣamsa n Tddukla Tamatut n Yimɛelmen Izzayriyen ( AGEA), tger-d tiɣri, deg ddurt iɛeddan, seg tamanaɣt n Lezzayer, ɣef udiwenni aɣelnaw i icudden ɣer tuttriwin yeɛnan iḥricen n tsertit d tdamsa, ladɣa deg uḥric n lebni, anda i d-yella uneḥbus n wazal n 3 650 n tkebbaniyin n lebni seg waggur n yennayer 2018. Aya yeglan s ustixer n 275 000 n yixeddamen seg useggas n 2017 ɣer wass-a. Ad naf, diɣ, ugar n 360 000 n tkebbaniyin i iqeddcen deg yir addad.
Deg unejmuɛ amatu amagnu, ssawlen-d yiɛeggalen n tddukkla (AGEA) i udiwenni aɣelnaw i usqerdec n tuttriwin i icudden ɣer tsertit d tdamsa, imi addad n luluf n tkebbaniyin timeqqranin n lebni, ixeddimen n baylek d tkebbaniyin n tsafut (BTPH) zemren seg wakud ɣer wayeḍ ad d-ttuḥebsen seg uxeddim. Wekkden-d yiɛeggalen iḥeḍren anejmuɛ n tddukkla d akken s kra n lḥir i d-yellan, ur yessaweḍ ara ad d-yeǧǧ tikebbaniyin ad xeddment akken iwata, s ssebba n waddad n tsertit d tdamsa i la tettidir tmurt.
Tger-d tddukkla-agi tiɣri i udiwenni aɣelnaw d imḍebbren n Uwanek, i tifin n tifrat s lemɣawla i temsal icudden ɣer yiɣeblan ttidirent tkebbaniyin tizzayriyin, ama d tidak n baylek , neɣ tusligin. Dayen ara d-yawin lfayda i tmurt d tdamsa taɣelnawt, ɣef leḥsab-nsen. Gar yisumar n tifrat n yiɣeblan n tkebbaniyin n lebni i d-tefka tddukkla AGEA, ad naf, deg tazwara, aneḥbus n lejrida n tkebbaniyin yesɛan amḍiq n tewwtin n yisenfaren imeqqṛanen, tuksa n lḥers d tiwsi ɣef tkebbaniyin n lebni, aɛiwed n tmuɣli deg yilugen n uselḥu n lecɣal n tkebbaniyin, tukci n ufus n tallelt d wafud i usmal n tnezduɣin. Daɣen tukci n tuɣdaḍin n ungim (conception) d uḍfar i tnariyin n tezrawin tizzayriyin d tlallit n temḍiqt n leqdicat i icudden kan ɣer uḥric n lebni. Tmenna tddukkla n AGEA talallit n yiwen n usanay aɣelnaw, ara d-yelhin s tallelt n tkebbaniyin timectaḥ d tlemmasin (PME) d tkebbaniyin timectaḥ d tlemmasin n temguri (PMI).
Ali Zalouk