Accueil Tamazight Annar akka i yettwarwat

Cwiṭ seg tmucuha n leqbayel

Annar akka i yettwarwat

47

Yiwen wass, iwala ugellid n tmurt yelli-s meqqret, yeεni tewweḍ i zzwağ. Yeqqim yettxemmim weḥd-s, yeqqaṛ: “Ay ul-iw, yelli ṭṭuqten-d fell-as inexḍaben, maca nekk bγiγ-as argaz i tt-yuklalen s tirrugza, mačči s yidrimen”. Acku yelli-s n ugellid, ur tt-ixuṣ ara uṣurdi, ma textaṛ di kra-nniḍen. Yettxemmim ugellid armi i t-id-tusa tekti. Yessawel i kra n yixeddamen-is, yenna-asen: “Ad truḥem ad d-tesnejmaεem meṛṛa At tmurt, ad asen-tinim, agellid yuqqem-d amgarad: win ara ifazen deg-s, ad yawi tarzeft d tameqrant.

Yiwen seg yiqeddacen n ugellid, yenna-as: “Ay agellid, amek ara nini ma steqsan-aγ-d γef ṣṣenf n temsizzelt neγ γef warraz d acut?”? Yenna-asen ugellid: “S tidet. Amgarad d akken win ara yesrewten annar n yirden, ur yumis d aγebbaṛ, d netta ara yaγen yelli tawḥiḍt εzizen”. Akken i teḍra. Mi i yeffeγ wawal akk wid-nni i igren iman-nsen deg umgarad, ur zmiren ara acku d awezγi ad tesrewteḍ annar ur tettγebbired. Armi, a-t-an yekker-d yiwen n yilemẓi, iban yeẓwer, yenna-asen i lεesker n ugellid: “Awit-iyi-d tazart”. Fkan-as-tt-id, yebda aserwet mebla leḥder am wiyaḍ armi yekfa yuγal ala aγebbaṛ.

Yenna-as ugellid:”Aql-ik ala aγebbaṛ yerna ur teεriḍeḍ ara ad tḥadreḍ iman-ik, d acu i d lmeqsud-ik?”. Argaz: “Ay agellid, annar akka i yettwarwat, ma d yelli-k win yebγun, yaγ-itt”. Yerra-as ugellid: “Ih a mmi d kečč i as-iwulmen”. Lmeqsud n urgaz d akken ccγel yesεa lqanun, ur yezmir yiwen ad t-ibeddel γef lmeqsud-nniḍen, ama d asurdi ama d ayen-nniḍen, lxudma tettwaxdem akken i as-d-yewwi lḥal. Qqaṛen wat zik:-“Yir ccγel yettgalla di bab-is”.

Yahia Yanes