Accueil Tamazight Ar melmi tifrat?

Addad deg tmurt n Lezzayer

Ar melmi tifrat?

89

Yenna Crif Xeddam deg tezlit-is: “ Lezzayer ncalleh ad teḥluḍ, ad tuɣaleḍ am zik-nni ”. Aggur d nnefṣ segmi i d-yeqqers ugdud am yiwen n urgaz, yeččur-d iberdan, yal tama n tmurt terra-d i teɣri. Tiɣri n ugdud, tiɣri n tlelli, tiɣri n truẓi n leqyud, leqyud-nni i ten-yurzen segmi tefra tegrawla, ziɣemma ur tefri ara. Deg wussan iɛeddan, yessuffeɣ-d uneɣlaf n temḥaddit isalli s uṭebbeq n umagrad 102, agdud yugi. Deg tazwara n yimalas-a, yella-d ubeddel deg udabu, ttwakksen yineɣlafen, uɣalen-d wiyiḍ, agdud ur yefriḥ ara, zun d turart i tturaren yis-s: kkes wa, err-d wihin, ma d tasertit-nsen yiwet. Ass n arim 2 yebrir 2019, yeffeɣ-d yisalli-nniḍen, ahat d win i rujan waṭas n Yizzayriyen, yeṭṭaxer uselway Butefliqa yeṭṭfen tamurt 20 d iseggasen-aya. Maca, ula tikkelt-a, agdud ur yeqniɛ ara. Imi yal lǧemɛa amḍan n yimdanen simmal yettnernay, ma d tifrat ar tura ur d-tban ara. Yeqqim-d yiwen n usuter, yiwen n yiswi, d rrwaḥ n unagraw s lekmal-is. Ahat azekka, ad tt-ṭṭfen wid ilaqen, amdan ilaqen i wadeg iwulmen. Agdud ass-a, yebɣa tilelli n tidet, tamurt ideg ara treṣṣi tugdut n tidet, tilelli n limin berra i yisuḍaf n ddin, yal wa ad yidir akken i as-yehwa, akken iwala, i ubaɣur n yiwet n tmurt, isem-is Lezzayer, s llsas n uɣerbaz iṣeḥḥan d tmetti yeldin d tutlayin iwulmen. Ar melmi tifrat, ar melmi ara d-teḍher tafat. Sya ar wass-nni, d asirem deg wulawen, tamurt ad d-teggri gar yifassen zeddigen d wid i tt-yuklalen.

Khaled Achoui