Accueil Tamazight Arraz ɣef twennaḍt i tddukkla Oxy-jeunes

Bgayet

Arraz ɣef twennaḍt i tddukkla Oxy-jeunes

209

Mačči aṭas-aya segmi i d-tennulfa tddukkla « Oxy-jeunes » i uḥraz d usnerni n tgemmi tagamant tamazrayt n Yiderginen. Tiwin n ttesriḥ-is s wudem unsib, yettuɣal ɣer useggas n 2016 kan. Ɣas mectuḥet tddukkla s lqaleb n wakud, maca meqqret s lebɣi i kesben yiɛeggalen segmi d-tlul, ɣef uqerruy-is aselway-is ilemẓi Xaled Fudil.

Dɣa, imi yelha usṭeɛref s win iqeddcen d usebɣes n win yuklalen, txemmem Tenmehla n yilemẓiyen d waddal n twilayt n Bgayet, neɣ DJS, i usnemmer d usebɣes n kra n tddukkliwin i twala qedcent deg unnar, fkant-d i tmetti, qennɛent s wahil-nsent. I lmend n uneḍruy-a, seg tɣiwant n Yiderginen, 45 n yikilumiṭren ɣer usamar n Bgayet, d tiddukkla-a « Oxy-jeunes » iwumi i d-yettunefk warraz ɣef wayen tga i ubaɣur n twennaḍt d ugama, d tigawin-is i d-tessuddes, neɣ ideg tekki, teɣzi n wayyuren yezrin, ama deg temnaḍt n Yiderginen neɣ deg tuddar-nniḍen.

Ad d-nesmekti d akken tga tddukkla « Oxy-jeunes » ayendin d armuden, inmettiyen ladɣa, ama d isilɣen, d tirziwin ɣer ugama, neɣ d isaragen. War ma nettu asfuggel qrib n yakk ussan-a imaḍalanen, neɣ igraɣlanen, i icudden ɣer tgemmi, ɣer twennaḍt neɣ ɣer ugama. «Ad snemmreɣ anemhal d yimḍebbren n Tenmehla n yilemẓiyen d waddal ɣef tigawt-a. Am wakken ara d-beggneɣ leqder-iw i yiɛeggalen d yimeltaɣen n tddukkla ɣef umecwar i d-newwi ar tura. Tura iban temɣur tmasit. Ihi, ad nkemmlet tikli lwaḥid», akka i d-yura uselway n tddukkla « Oxy-jeunes » deg usebter-nsen n Facebook. Seg tama n yimezdaɣ d yisegbaren n umussu asdukklan, ayendin i yumren mi tettwasebɣes tddukkla-a tilemẓit « Oxy-jeunes ».
M. K.