Tberreḥ-d ddurt iɛeddan tselwayt n tesbeddit Matub Lwennas, Malika Matub, s yisenfaren igejdanen n tesbeddit-agi, deg usarag i tga deg Uxxam n yidles Mulud Mɛemmeri i lmend n usfugel n umulli n wis 63 n tlalit n «Uɣewwaɣ».
texdem-d diɣ taḥawact n 20 n yiseggasen n wayen ay tga Tesbeddit n Matub Lwennas yernu tebder-d isenfaren imeqranen i tga tesbeddit-a ɣer yidis n yisurifen i usifrer n tidet n tmenɣiwt n gma-s, asebded n usalay uslig ara tsedduy tesbeddit. Tenna-d belli asenfar n usalay « iswi-ines d aḥraz n tkatut d tgemmi n umedyaz Lwennas Matub ». Tiɣawsiwin tudmawanin n ucennay Matub Lwennas (1956-1998), d tigemmi i ucennay-amedyaz yerna ad rsen deg usalay i d-gan d tajmilt i unaẓur-a, ɣef wakken i t-id-tenna tselwayt n Tesbeddit n Matub Lwennas ass n letnayen yezrin deg Tizi Uzzu. « Tiɣawsiwin-ines tudmawanen, gar-asent allalen-ines n uẓawan, takeṛṛust ideg yettwanɣa ass n 25 Yunyu 1998, ula d iceṭṭiḍen-is ad ttwaḥerzen acku d aḥric seg tkatut tamazdayt ». Am wakken daɣen i tekkes ccek ɣef kra n temsal, yeqqnen ɣer usalay-agi, anda i d-tenna : « Asalay-a, ad yili d uslig (privé), maca ad yettwabnu deg yiwen wadeg yettabaɛen ɣer teɣlift n usegmi aɣelnaw. Ttunefkent-aɣ-d 3 n tzeɣwa deg uɣerbaz amenzu Mbarek Matub n taddart n Tewrit Mussa Waɛmer, yerna ad t-bnun sdat uxxam n Lwennas, mačči deg uxxam-is, ɣef wakken ay d-tenna.
Tadrimt tusligt i tezrawin ara yettwaxdamen fell-as
Gar yisenfaren-nniḍen uɣur terra lwelha-s tesbeddit Matub Lwennas, d tukci n tedrimt tusligt (bourse) i lmend n usebɣes n tezrawin ara yettwaxdamen ɣef leqdic merra n ucennay Matub. Ad tettunefk i yisdawanen d yimnadiyen ara ixedmen tizrawin-nsen deg taɣulin yemxalafen ɣef ugerruj n Lwennas (adlis aɣewway, tizlatin-is, aẓawan-is…). Annect-agi, ad yili s tallelt n usqamu ussnan n tesdawit Mulud Mɛemmeri n Tizi Uzzu, ara d-yefken tulmisin i ilaqen i wakken ad tefk tesbeddit-agi tadrimt, ɣef wakken i t-id-tenna Malika Matub. Am wakken daɣen, i d-tberreḥ Malika Matub, taselway n tesbeddit-agi, belli ad yili sya ɣer sdat lebni n yiwen n uɣerbaz n uẓawan, ara yawin isem n Matub Lwennas. Ara d-yilin ɣef leḥsab-is deg temdint n Tizi Uzzu.
Ghani Amazigh