Yella umaru-ameɣnas Allas Di Tlelli, ass n 5 tuber yezrin, ɣef 14 :00, d inebgi n temlilit taseklant i d-tettheyyi tddukkla Azday n Uweqqas deg unammas adelsan Reḥmani Sliman.
S uzwel n « Taqbaylit: d acu-ten yiberdan akkin i tezɣint n Lezzayer? », yewwi-d awal ɣef tekliwin tiɣerfanin i d-yettilin yal sem i yettwali beɛdent akken ad asent-nsemmi « tagrawla ».
« Ɣur-i nekk d tasmessit meqqren kan, imi ulac deg-s tigejda n umussu asertan neɣ dɣa n tegrawla, am wayen icban udem neɣ takza, taɣessa, arkawalen yettwarun, taferkit n ubrid iccuden, iswan usdiden (…) », i d-yenna. Yerna yenna-d ɣef waya d akken, « d aya merra i yeǧǧan 33 n tikliwin i d-yellan yal ass n sem, d tid ur d-newwi kra d tarennawt i umennuɣ ɣef tugdut n tilawt imi teqqim-d kan di ccnawi s taεrabt ula di tmurt taqbaylit ».
Ɣur Mass Allas Di Tlelli, « yewwi-d ad d-yili umeslay ɣef timsal tigejdanin icudden ɣer usenfaṛ n tmetti ara yettwasbedden deg umḍiq n udabu, ma yella yeɣli, am wayen yecban taggara n usεuṛṛeb n uɣerbaz d tedbelt, talakt d tlelliyin akken ma llant », i iwala.
Gar cwiṭ d waṭas, yebder-d daɣen umsarag taluft n ubrid iwulmen n umennuɣ d wamek ilaq ad d-yelmed yal yiwen seg temsirin Ɛimac Ɛmer, Bennay Wali, Masin Uharun, Agraw n Yimaziɣen, tanekra n Tefsut n 1980, atg.
Ugar n waya, yettwawi-d wawal ula ɣef taluft n yisluguten i yettwaddamen da d din, d yinumak yemgaraden i d-ttakken gar Tmurt n Yiqbayliyen d temnaḍin-nniḍen n Lezzayer, d wamek i yessefk si tura ad imuqel yal yiwen ɣef ubrid d tifrat tisertanin ara yeffɣen fell-as.
Seld inaw-is, yella-d uskasi akked yimeḥḍar i d-yusan s ṭṭaqa ass-nni.
M. K.