Mazal tiddukkla tadelsant “Imnar n Tdukli” n Ait Aissa Mimoun, tettkemmil leqdic-is deg usuddes n yisaragen yemxalafen. Dɣa ass-nni n lǧemɛa, 17 maggu 2019, ɣef 21h00 n yiḍ, deg Usɣim n Waggur azeggaɣ azzayri (CRA) n Ait Aissa Mimoun, yella-d usarag wis sin n tddukkla-a. Gan-t-id sin yisdawanen-agi: Mass Chabane Mahdi akked Mass Zaif Mahdi. Wwin-d awal s telqay deg temlilit-agi ɣef wamek teddes tmetti taqbaylit d acu n unegmu i d-yellan deg-s? Am wakken daɣen i d-mmeslayen ɣef wamek tteddunt temsal di tuddar n Leqbayel (tajmeɛt). Yella-d diɣ, wawal ɣef wazal i tesɛa teywalt deg tmetti taqbaylit taqburt, d wanda tessaweḍ teswiɛt ass-a. Mass Chabane Mahdi, yemmeslay-d ɣef wayen yettilin seg umnar n tewwurt ɣer daxel, dɣa yenna-d : “D tamɣart i d taxeznaǧit n uxxam, d nettat i d-yelhan s yikufan… Ma d amɣar, yelha-d s tlufa n berra d trebga n warraw n warraw-is”. Ikemmel daɣen, yessefhem-d s telqay tuddsa n tejmeɛt n taddart. Yemmeslay-d diɣ ɣef ufran n yiɛeggalen n tejmeɛt d wid n teseqqamut n taddart ass-a. Yenna-d belli : “Zik d tajmeɛt n taddart i iferrun timsal, acu kan tizi n wass-a, tettwabeddel s teseqqamut n taddart, maca axeddim-is yegzem kan deg wakal n tɣiwant”. Ma d Mass Zaif Mahdi, yewwi-d awal ɣef wayen yettilin deg berra n uxxam, dɣa yenna-d : “Taddart, tebna ɣef uxxam, syin n d adrum mbeɛd d taqrart, akken alamma tewwḍeḍ ɣer taddart s timmad-is”. Am wakken, daɣen i d-yemmeslay ɣef umahil n yal amdan deg tmetti, dɣa yenna: “Amdan ixeddem i ugraw yettidiren deg tmett-nni, ula d agraw-nni ixeddem ɣef umdan”. Mi ssulin awal-nsen, yella-d uskasi sɣur wid yellan deg tzeqqa-nni, yezzi wawal deg-s ɣef waṭas n temsal i d-yeqqnen ɣef usentel-a “Anegmu n unagraw n tuddsa n tmetti taqbaylit taqburt” i fernen yimsirgen-agi ad yili d azwel n usarag-agi-nsen. Am wakken daɣen i d-llant tnagiyin sɣur yimɣaren iḥedren dinna ɣef tudert d usuddes n tmetti taqbaylit taqburt. Ɣer taggara, ad d-nesmekti belli asarag aneggaru yettwajerden, yetturaǧu ad yili ass, 30 maggu 2019, ɣef waṭṭan n ssker, ideg ara yili umejjay Amar Benassil d imsireg n temlilit-a.
Tameɣra meqqren i lfayda
n yimeḍharen n tɣiwant-a
Azekka n ttlata, 21 maggu 2019, ad tili tmeɣra meqqren ara d-yilin i lfayda n 27 n yimeḍharen ijerden iman-nsen i wakken ad-zeynen. D leqdic i d-thegga tddukkla tadelsant “Imnar n Tdukli” n Ait Aissa Mimoun s tallelt n Waggur azeggaɣ azzayri n tama-agi, d tazeqqa n tmeɣriwin “Berbèrè” n Lazib Ouheddad ara d-yesdurin tameɣra-a. Ad tebdu tmeɣra-agi ɣef 21h30 n yiḍ, ideg ara d-ilin ddeqs n leqdicat idelsanen i lmend n yigerdan-a. Gar wayen yettwaheggan deg wahil, ad d-nebder tuqna n lḥenni i 27 n yimeḍharen-agi, ccnawi d tbuɣarin sɣur timɣarin n tama-agi, afraq n wurraren i yigerdan-agi. Yettuɛeggen diɣ ad yili usiher n yimseḍsi neɣ n useḥḥar ɣer tama n tmeɣra n ccna, ideg ara d-ccnun kra n yilmeẓyen n tama-agi. Ad ibdu leqdic n tddukkla, s talilt n telmeẓyin d yilmeẓyen ara d-yecnun kra n tezlatin.
Am wakken daɣen ara d-ilint snat n tejmilin, tamezwarut, ad tili i yiwet n temɣart n taddart n Ighil Bouchene, i yellan d tameṭṭut n umjahed. I lmend n waya, yella-d usileɣ n ugraw n yilmeẓyen deg tsellak timezwura “secouriseme”, i d as-yeran tajmilt i temɣart-a. Ma tis snat, ad tili i uselway n teseqqamut n Waggur azeggaɣ azzayri n tama n Ait Aissa Mimoun, wagi d Ali Kheddam. Ad ilint tnagiyin sɣur yimeddukkal-is n uxeddim d wayen-nniḍen. Ɣer taggara, ad d-nesmekti kan belli seldazekka n larebɛa, 22 maggu 2019, ad tili ṭṭhara n 27 n yigerdan-agi deg ssbiṭer n Tigzirt.
Ghani Amazigh