Yebda, ussan-a, ureqqeɛ d yidil n ubrid n Buṭeɣwa deg taddart n Ayt Ɛisa, taɣiwant n Uweqqas, ɣef teɣzi n wugar n kraḍ n yikilumitren. Seld mi yella deg yir addad, yewɛer nezzeh i tikli, a-t-an teṭṭef tɣiwant-a tarmist i d-yelhan d lecɣal n useggem d udil-ines s ubiṭun n ubitum.
D ayen i d-yewwin ayendin d tumert mačči kan i yimezdaɣ n temnaḍt-nni, maca daɣen ula i wid yettxalaḍen amezgun n tzegzewt n Buṭeɣwa akked unnar n ddabex n uḍar i yellan di lemsaq-nni. Acku, i telɣut, abrid-a n Buṭeɣwa iɛedda tama n umezgun n tzegzewt, i tebna tddukkla n Ayt ɛisa, rnu yettawi i unnar n taddart-nni. Ula d annar-a i tuɣ d amihan maḍi i turart, seld tasutert n kra n yilemẓiyen n Buṭeɣwa, yewwi-as uqeddac n termist azal n 116 n yikamyan n wakal, yessenɣel-iten deg-s.
D ayen i t-id-yerran yeqɛed cwiṭ i turart, am wakken ara yishil i ugari i wid akk i d-irezzun s tkeryas i umezgun n Buṭeɣwa. «Tura akka ad igerrez ubrid i d-yettawin akk wid iḥemmlen tuẓuri d ubraḥ n umezgun n Buṭeɣwa », i d-tenna tselwayt n tddukkla n Ayt Ɛisa, Massa Farida Ǧabri. Send ad tkemmel:
« Ma d areqqeɛ n wagnes n unnar n Buṭeɣwa ad d-yawi sin n yibaɣuren; yiwen i warrac-nneɣ i iḥemmlen turart n ddabex n uḍar. Wayeḍ i yinebgawen i d-yettasen si lebɛid i umezgun-nneɣ. Sya d tasawent, ala imuḍan ara yesseḥbasen tikeryas meqrub amezgun. Imdanen i yellan s tezmert-nsen, yif ad ttgarin deg unnar n Buṭeɣwa », i d-tenna. Ad d-nesmekti d akken tɛeṭṭel cwiṭ yir liḥala n tegnewt tikli n yiqeddicen deg wussan yezrin. Imi, am temnaḍin timesdurar, ur d-sutren ara kan areqqeɛ n tesna n ubrid-nni, maca ula rrif rrif yettili-d wanida ilaq lebni n yiɣulad neɣ d ifergan n tɣellist.
M. K.