Yerza umaswaḍ n tmaziɣt Mass Ɛebḍella Ɛerqub ɣer twilayt n Tlemsan, s yisem-is d netta i yellan i lmendad n yiselmaden n tmaziɣt yettmahilen deg tama-a. Tamentilt i t-yewwin d asenṣeb n kra n yiselmaden, acku d lawan ad ɛeddin. S wakka ad rnun ɣer twacult n yiselmaden n tmaziɣt s wudem unṣib. Ahil yebda-t Mass Arkoub ass-nni n acer; 14 yebrir, s tirza-s ɣer temnaḍt n Rremci anda i yessenṣeb Massa Werǧa d Habet. Syin yewwi-t ubrid ɣer tlemmast n temdint ad ikemmel deg umahil. Ma d ass n arim, d nnuba n uselmad Tadrist ad d-yexdem tamsirt-is ula d nutni sdat n umaswaḍ-ines.
Ass n aram seg tnezzayt ar tmeddit, mlalen-d akken llan yiselmaden d umaswaḍ deg tesnawit tamaynut Mliḥa Hamidu deg tlemmast n temdint n Tala Yemsan, gan deg-s ass n usileɣ ɣef uselmed n tirawalt d uktazal deg ukala n ulmud. Ass n ahad d ass aneggaru n uselken, imi yerza ɣer Zwiyya deg Meɣneyya di tlisa n Lmerruk d Lezzayer, tikkelt-a d nnuba n Mass Gidun. D asmekti kan, ar tura llan 18 n yiselmaden deg waɣir n Tala Yemsan, msebḍan ɣef ddeqs n tamiwin n twilayt. Tirza-a n Mass Arkoub deg lawan-a n tefsut n yimaziɣen i usenṣeb n yiselmaden, d akemmel n tirziwin xedmen yimaswaḍen-nniḍen deg wussan iɛeddan ɣer berra n tmurt n Leqbayel, gar-asen Mass Ɛli Lewnis i yeṭṭfen tamnaḍt n Mostaganem, d Mass Mellab Murad i yellan i lmendad n yiselmaden n Bechar.
Yetturaju daɣen Mass Arkoub Abdellah deg yimalas-a , ad d-yeṭṭef abrid-is seg Tlemsan ɣer Wehran anda i mazal yiwet n tselmadt yesselmaden di tama n Beṭṭiwa yettraju-tt usenṣeb ula d nettat. Syin yettuɛeggen deg wahil ad yeg timlilit d yiselmaden ass n arim si ṣṣbeḥ ar tmeddit, deg-s ad mmeslayen ɣef wamek iɛedda useggas n uselmed (tasemlilt tamatut), d wuguren i d-mlalen yiselmaden-a deg unnar d yiṣenfaren i d-yewwi ad ttwaxedmen sya d afella.
Khaed Achoui.