Accueil Tamazight Asenfar i uheggi n yisura n teqbaylit

Fransa

Asenfar i uheggi n yisura n teqbaylit

110

Akken ad telḥu tutlayt n tmaziɣt ɣer sdat, yewwi-d ad yaget leqdic deg taɣulin yemxalafen, ama d ayen yerzan yakan tutlayt d uselmeds-is, ama d ayen yerzan idles akk icudden ɣur-s, ama diɣen d taɣulin yecban tasenselkimt d tetiknulujit i yebdan tettemhaz akken ilaq. Ula d aḥric n ssinima iga isurifen ɣer sdat, imi yal tikkelt nsel s kra n umaynut yeffeɣ-d u yerna-d ɣer taɣult-a. Deg tmurt n Leqbayel neɣ deg Lezzayer s umata, neɣ ula di tmura n berra ideg ttidiren Leqbayel s waṭas, timura yecban Fransa, Marikan, Kanada.

Ciné-Club ASARU, neɣ agraw n ssinima ASARU, d yiwen gar leqdicat ifazen i d-thegga tddukkla “Digital Média Kabyle” di tmurt n Fransa. D leqdic ara yilin d agraɣlan, ara yesnernin ssinima taqbaylit deg waṭas n tmura n umaḍal. Gar yiswiyen n ugraw-a ASARU, d asebɣes d tmerna n ufud i wid ixeddmen ssinima taqbaylit. Daɣen, “d asenɛet n yisura, d umeslay fell-asen, akken ad yennerni leqdic d tektiwin ɣef tẓuriwin i d-ikeccmen deg usnulfu n ssinima. Sya ar sdat, ad d-yili ula usuffeɣ n tesɣunt ɣef ssinima taqbaylit, u ad yili leqdic-a d abrid i usbeddi n Tfaska n usaru aqbayli di temdint n Paris d tin n Stokcholm”, akka i t-id-nnan kra n yimsuddsen n ugraw. Tisekwa timezwura a-tent-an ttwaldint deg tmurt n Leqbayel, Kanada, Fransa d Stokcholm.

I wakken ad yili beddu unṣib, ad d-yili usenɛet n yisura imecṭaḥ i gan yilmeẓyen iqbayliyen i iqeddcen di taɣult-a. Ma d tullya tunṣibt n Ciné-Club ASARU, ad d-tili deg wass n 25 maggu 2019 deg temdint n Paris ɣef 13h30 deg ssinima Le BARDY i d-yezgan deg 39 azniq n Strasbourg 75010 Paris. D asaru amenzu “D wagi i d asirem” n Rida Amrani akked “Agulal Rod” ara d-iɛeddin, u ad d-yeglu s uskasi ɣer taggara n usaru. Leqbayel i zedɣen di tmurt n Fransa, neɣ imeddukkal-nsen, ttwaɛerḍen ad ḥeḍren i tullya-a tamazrayt n DMK, diɣen ad sbeɣsen asenfar-a ilan tixutert meqqren i teqbaylit, ma d imukan mačči aṭas i yellan, akka i d-yenna ugraw adeblan n DMK. Akken diɣen i d-ggaren tiɣri i yilmeẓyen iqbayliyen i iqeddcen, i iḥemmlen taɣult n ssinima, i yebɣan ad temhaz ssinima taqbaylit, d akken ad qqnen taywalt d snat n tuddsiwin DMK d Média Kabyle Associés.

Kh. A.