Ass n amhad yezrin i d-tella temlilit taseklant deg Uxxam n tddukkla Numidya n Wehran. D timlilit iga umyaru aneggal Youcef Achouri, yewwi-d asarag i wazal n tamert, deg-s yewwi-d awal ɣef wungal-is amaynut i d-yeffɣen taggara n 2018 ɣer teẓrigin Aṭfaluna, d ungal iwumi yefka azwel “Ixef n usennan”.
D yiwen n wungal daɣen iwumi iga umyaru tasuqilt neɣ tiririt ɣer teqbaylit s wayen iwumi neqqar amsasa (adaptation), d tikti i d-yewwi seg udlis “Captive bride” n umyaru aglizi Rosemary Carter. Asarag-a, ḥeḍren-t kra n yiɛeggalen n tddukkla d kra-nniḍen seg wid iḥemmlen ad ɣren idlisen s tmaziɣt.
Ar taggara, yella-d usqerdec d uskasi gar umsarag d yimeɣriyen, yefka-d agzul Mass Ɛacuri ɣef udlis-is i d-yettmeslayen ɣef tayri lqayen yezdin gar Ṭariq d Ruza, maca jeddi-s n Ruza yugi tadukli-a, acku Ṭariq d aẓawali u yella ixeddem ɣur-s iferreḍ i zzwayel. D ayen i yeǧǧan Ṭariq ad iɣab acḥal d aseggas, ad d-yerfed iman-is u ad d-yuɣal d amerkanti.
Ɣer taggara, ad iruḥ ad d-yaɣ akk ayen yekseb jeddi-s n Ruza. Ma ɣer taggara n usarag, yella-d usenzi s ubuddu d tugna yezdin akk widak iḥeḍren i temlilit-a. Ar tura, Mass Youcef Achouri, ɣur-s kraḍ n wungalen, ammud n yisefra, ammud n tullisin d tsuqelt n yiwet n tmezgunt n Abdelkader Alloula.
Khaled Achoui