I lmend n teẓrigt tamenzut n Tfaska n uderyis, thegga-d tddukkla tinmettitadelsant Tala di taddart Iɣil Ɛemmar, taɣiwant n Tmezrit, yiwen n uneḍruy s wazal-is ass n 01 meɣres iɛeddan, deg uɣerbaz amenzu Ḥemdawi Saleḥ Ǧimaɛ. Deg wahil n wass-nni, tettwahegga-d tazla ɣef 10:00 n tnezzayt i yinaddalen d yilemẓiyen n temnaḍt-nni, ama d arrac neɣ d tiqcicin.
Dɣa, i lmend n uzgen n umaraṭun-a, tella teffeɣ-d tiɣri kra n wussan send, i yilemẓiyen yesɛan gar 10 d 17 n yiseggasen, ma bɣan ad kkin s uxelles n 100 n yidinaren. Syinna, mettwal 14:00 n uzal, tella-d teldayt tunsibt n tfaska-a, di teẓrigt-is tamezwarut. Aredqal, d amaru amekfaḍu deg umaṭṭaf n Sumam, Mass Karim Cix, i d-yewwin asarag s uzwel «Aderyis; ansay, anamek ». Deffir usarag, yesseḍfer-d tanezzut s ubuddu n yidlisen-is i d-yessufeɣ taggara-a. Armi ahaqel-itt d 15:30, tɛedda-d talilt n uxxam n yilemẓiyen Mulud Ferɛun n Leqser i tiwin n kra n ccnawi i yimeḥḍar i yellan di ttiɛad.
Meqrub 16:00 n tmeddit, yewweḍ-d lawan n tceqquft n umezgun i d-sneɛten yilemẓiyen n ugraw « Imdukkal ». Deg ukemmel n wahil, tella-d syin d tasawent tedwilt n tmenna n yisefra sɣur kra n yimedyazen, am wakken i d-yemmug yiwen n uskač n unecraḥ sɣur terbaɛt « Itran ». Mi d-tuɣal i tikkelt-nniḍen talilt i kra n ccnawi, ɛeddan yimheggiyen i tikci n warrazen i wid i d-yesseknen teẓwer. Akken ɣer taggara n warmud, zdin merra yimekkiyen I seksu n uderyis. Ma nemmeslay-d ɣef umezruy n tddukkla-a tilemẓit Tala, ad t-naf yebda ass n 08 mayu aseggas n 2013. Tura akka d Mass Nabil Mercic i yellan ɣef uqerruy-is.
M. K.