Accueil Tamazight Asfuggel n wass aɣelnaw n ttejra

Tasexriwt

Asfuggel n wass aɣelnaw n ttejra

66

I lmend n wass aɣelnaw n ttejra i d-yettuɣalen ass n, 25 tuber n yal aseggas, thegga-d tddukkla Oxy-jeunes, s tallelt akked Uḥraz n tẓegwa n ufurek n Yiderginen d tɣiwant n Tsexriwt, yiwen n wass n wuẓẓu n ttjur deg taddart n Ayt Ɛli Umḥend i ibeɛden s wazal n 60 n yikimitren seg Bgayet. Aberriḥ i yettwaddmen tikkelt-a d: «Ttejra, d tudert». Ɣef wakken i d-nnan yimekkiyen, gar yiswan n wahil-a n wuẓẓu, ugar n useḥbiber ɣef twennaḍt, d amennuɣ mgal tukksa n teẓgi d usixi n wakal i yettḥerriken deg kra n yimeḍqan dinna.

Imi neḥsa d akken ttejra s yiẓuran-is i tessentay di lqaɛ n tmurt, aql-itt seg yiferdisen igejdanen i iteṭṭfen akal bac ur yettegrirrib. Akken ad as-fken ugar n tebɛed d wazal i warmud-a akuluji, ɛerḍen-d yimheggiyen ula d inelmaden n uɣerbaz amenzu akken ad ḥeḍren, ad kkin deg wuẓẓu n tmeɣrusin ula d nutni. Wid yellan s umata ass-nni, ttafaren ula d aqusis n tatlitit n tala n Buɛisi. Dɣa, ttwaẓẓant deg wakud i teṭṭef tigawt-a azal n 100 n tmeɣrusin n kalitus d tumert deg yiwet n tegnit n tumert d ucmummeḥ. Am wakken i d-heyyan deg umḍiq yimekkiyen yiwet n tedwilt n usḥulfu n yimecṭaḥ ɣef wazal i yesɛa useklu d wamek ilaq ad d-lhun yis-s, ad ḥemmlen agama ideg i d-ttnekkaren.

S umata, yehwa-asen mliḥ i warrac wayen i d-ssnen ɣef ttejra, fkan tameẓẓuɣt i wid i asen-yemmalen. Akken i d-nnan yiɛeggalen n tddukkla « Oxy-jeunes », ɣef uqerruy-is Mass Fuḍil Xaled, mazal ad d-ilint tigawin n wuẓẓu imalasen i d-iteddun deg tɣiwanin-nniḍen n twinest n Yiderginen. Ɣer taggara, yelha ad d-nesmekti d akken aṭas iwumi yehwa warmud-a seg yimezdaɣ n Ayt Ɛli Umḥend.

M. K.